काठमाडौं। सरकारले सिफारिस गरेको संवैधानिक परिषद्सम्बन्धी अध्यादेशलाई लिएर राजनीतिक दबाब बढ्दै गएको छ ।
यही क्रममा प्रमुख प्रतिपक्षी दल नेपाली कांग्रेसका संसदीय दलका नेता भीष्मराज आङ्देम्बेले शनिबार राष्ट्रपति रामचन्द्र पौडेलसँग भेटवार्ता गरेका छन् ।
शीतल निवासमा भएको भेटमा आङ्देम्बेले विपक्षी दलहरूको साझा धारणा राष्ट्रपतिसमक्ष राख्दै विवादित अध्यादेश जारी नगर्न आग्रह गरेका हुन् ।
उनले संसद् सञ्चालनको वातावरण हुँदाहुँदै अध्यादेशमार्फत संवेदनशील विषय अघि बढाउनु लोकतान्त्रिक अभ्यास विपरीत हुने बताएका छन् ।
आङ्देम्बेले सरकार संसद् छल्दै अध्यादेशको बाटोबाट निर्णय लाद्न खोजेको आरोप पनि लगाएका छन् ।
संवैधानिक नियुक्ति जस्ता विषयमा सहमति र संसदीय प्रक्रियालाई बेवास्ता गर्नु उचित नहुने विपक्षी पक्षको धारणा उनले राष्ट्रपतिलाई सुनाएका थिए ।
यसअघि विपक्षी दलहरूको संयुक्त बैठक बसेर सरकारको कदमप्रति असन्तोष व्यक्त गरिएको थियो ।
बैठकमा नेपाली कांग्रेस, नेकपा एमाले, नेपाल कम्युनिस्ट पार्टी तथा राष्ट्रिय प्रजातन्त्र पार्टीका प्रतिनिधिहरू सहभागी भएका थिए ।
उक्त बैठकले अध्यादेश फिर्ता लिन सरकारसँग माग गर्दै तत्काल सङ्घीय संसद्को अधिवेशन बोलाउनुपर्ने निष्कर्ष निकालेको थियो ।
विपक्षी दलहरूले मुलुकका महत्वपूर्ण विषय संसद्मा छलफल गरेर मात्रै टुङ्ग्याउनुपर्नेमा जोड दिएका छन् ।
पछिल्लो समय सरकारले संसद् बैठक बोलाउन ढिलाइ गरिरहेको र अध्यादेशमार्फत शासन सञ्चालन गर्न खोजिरहेको भन्दै विपक्षी दलहरूले निरन्तर आलोचना गर्दै आएका छन् ।
अब राष्ट्रपतिले यस विषयमा के निर्णय लिन्छन् भन्ने चासो राजनीतिक वृत्तमा बढेको छ ।
प्रकाशित मिति: १९ बैशाख २०८३, शनिबार
प्रतिक्रिया