काठमाडौं। राष्ट्रिय स्वतन्त्र पार्टी (रास्वपा) ले चैत मसान्तभित्र सुकुमबासी तथा घरबारविहीन नागरिकहरूको समस्या व्यवस्थापन (सुकुमबासी समस्या समाधान) गर्न सरकारलाई सुझाव दिएको छ ।
आइतबार बसेको रास्वपा सचिवालय बैठकले घरबारविहीन सुकुमबासीहरूको कम्तीमा ७५ प्रतिशत समस्या समाधान गर्न सरकारलाई आग्रह गरेको हो ।
बैठकपछि पार्टी प्रवक्ता मनिष झाले जारी गरेको विज्ञप्तिमा भनिएको छ, “सुकुमबासी तथा घरबारविहीन नागरिकहरूको समस्या समाधानका लागि अधिकार सम्पन्न प्राधिकरण गठन गर्नुपर्छ ।
चैत मसान्तसम्म कम्तीमा ७५ प्रतिशत सुकुमबासीको व्यवस्थापन गर्नुपर्ने र प्राधिकरण गठन भएर लगत संकलन नभएसम्म अन्यत्र डोजर नचलाउने सुनिश्चितता गर्न सरकारलाई सुझाव दिइएको छ ।”
रास्वपाले सुकुमबासी समस्या दीर्घकालीन रूपमा समाधान गर्न प्राधिकरण गठन गरी लगत संकलन, व्यवस्थापन र पुनर्स्थापना गर्नुपर्नेमा जोड दिएको छ ।
पार्टीले यो विषयलाई प्राथमिकतामा राखेर सरकारलाई तत्काल कदम चाल्न आग्रह गरेको हो ।
सुकुमबासी तथा अव्यवस्थित बसोबासी समस्या काठमाडौं उपत्यकालगायत देशका विभिन्न ठाउँमा बढ्दै गएको छ ।
रास्वपाले यसलाई सहरी विकाससँग जोडेर समाधान गर्नुपर्ने बताएको छ ।
यो सुझावसँगै अब सरकारले सुकुमबासी व्यवस्थापनमा कस्तो कदम चाल्छ भन्नेमा आमचासो बढेको छ ।
प्रकाशित मिति: २० बैशाख २०८३, आइतबार
प्रतिक्रिया