कञ्चनपुर। पुनर्वास नगरपालिका–७ स्थित एक इँटा उद्योगमा ट्याक्टर अनियन्त्रित हुँदा दुई जनाको मृत्यु भएको छ भने एक जना घाइते भएका छन्।
जिल्ला प्रहरी कार्यालयका अनुसार रातिको समयमा मजदुरहरू काँचो इँटाको चट्टामाथि सुतिरहेका बेला पानी छर्किने काममा प्रयोग भइरहेको ट्याक्टर अचानक अनियन्त्रित भई सोही स्थानमा ठोक्किएको थियो।
दुर्घटनामा भारत उत्तर प्रदेश, बहराइचका २७ वर्षीय अजय कुमार गम्भीर घाइते भएका थिए। उनलाई उपचारका लागि सेती प्रादेशिक अस्पताल लगिए पनि चिकित्सकले मृत घोषणा गरेका छन्। त्यसैगरी ९ वर्षीय पवन कुमारको उपचारकै क्रममा अर्को अस्पतालमा ज्यान गएको प्रहरीले जनाएको छ।
घटनामा घाइते भएका ११ वर्षीय घुर्रा कुमारको सेती प्रादेशिक अस्पतालमा उपचार भइरहेको छ।
प्रहरीका अनुसार दुर्घटनामा संलग्न ट्याक्टर र पानी छर्किने ट्याङ्कर नियन्त्रणमा लिइएको छ भने चालक फरार रहेका कारण उनको खोजीकार्य जारी रहेको छ।
प्रकाशित मिति: २१ बैशाख २०८३, सोमबार
प्रतिक्रिया