काठमाडौं । सर्वोच्च अदालतको प्रधानन्यायाधीश नियुक्ति सिफारिससम्बन्धी निर्णयका लागि सिंहदरबारमा संवैधानिक परिषद्को बैठक जारी रहेको छ ।
न्याय परिषद्ले यसअघि नै सर्वोच्च अदालतका ६ जना न्यायाधीशको नाम प्रधानन्यायाधीश पदका लागि सिफारिस गरिसकेको छ । ती सिफारिसमाथि अब संवैधानिक परिषद्ले औपचारिक निर्णय गर्ने तयारी गरिरहेको हो ।
प्रधानन्यायाधीश प्रकाशमान सिंह राउत उमेरहद ६५ वर्ष पूरा भएसँगै गत चैत १८ गतेदेखि अवकाशमा गएपछि उक्त पद रिक्त रहेको छ । राउतको अवकाशपछि सर्वोच्चकी वरिष्ठतम् न्यायाधीश सपना प्रधान मल्लले कामु प्रधानन्यायाधीशको जिम्मेवारी सम्हालिरहेकी छन् ।
न्याय परिषद्ले सपना प्रधान मल्लसहित कुमार रेग्मी, हरिप्रसाद फुयाल, डा. मनोजकुमार शर्मा, डा. नहकुल सुवेदी र तिलप्रसाद श्रेष्ठको नाम संवैधानिक परिषद्को सचिवालयमा पठाएको थियो ।
संविधानको धारा १२९ को उपधारा (३) अनुसार सर्वोच्च अदालतको न्यायाधीशका रूपमा कम्तीमा तीन वर्ष कार्यअनुभव भएको व्यक्ति प्रधानन्यायाधीश नियुक्तिका लागि योग्य हुने प्रावधान छ । सोही आधारमा आवश्यक योग्यता पुगेका न्यायाधीशहरूको नाम सिफारिस गरिएको हो ।
बैठक जारी रहँदा नयाँ प्रधानन्यायाधीश को बन्ने भन्ने विषयमा राजनीतिक र न्यायिक वृत्तमा व्यापक चासो देखिएको छ ।
प्रकाशित मिति: २४ बैशाख २०८३, बिहिबार
प्रतिक्रिया