काठमाडौं। ललितपुरको लेलेस्थित ओमकार आयल इन्डस्ट्रिजका सञ्चालक विजय श्रेष्ठ पक्राउ परेका छन् ।
‘छहारी’ र ‘ओमकार’ ब्रान्डका सूर्यमुखी तेलमा तोकिएको मापदण्डभन्दा कम तौल राखेर उपभोक्तालाई ठगी गरेको आरोपमा प्रहरीले उनलाई नियन्त्रणमा लिएको हो ।
काठमाडौं उपत्यका अपराध अनुसन्धान कार्यालयका अनुसार उद्योगले उत्पादन गर्ने सूर्यमुखी तेलको प्याकेटमा उल्लेख गरिएको परिमाणभन्दा कम तेल राखेर बजारमा बिक्री भइरहेको सूचना प्राप्त भएपछि छापा मारिएको थियो ।
प्रहरीले गोदावरी नगरपालिका–५ स्थित उद्योगमा अनुगमन गर्दा प्याकेटमा लेखिएको तौल र वास्तविक तेलको मात्रामा फरक भेटिएको जनाएको छ ।
छापा मार्ने क्रममा प्रहरीले बिक्रीका लागि तयारी अवस्थामा रहेका ९०५ कार्टुन सूर्यमुखी तेल बरामद गरेको छ ।
प्रहरीका अनुसार पक्राउ परेका श्रेष्ठलाई थप अनुसन्धान तथा कानुनी कारबाहीका लागि जिल्ला प्रहरी परिसर ललितपुर पठाइएको छ ।
उनीमाथि नापतौल तथा उपभोक्ता ठगीसम्बन्धी कसुरमा अनुसन्धान अघि बढाइएको प्रहरीले जनाएको छ ।
प्रकाशित मिति: २५ बैशाख २०८३, शुक्रबार
प्रतिक्रिया