काठमाडौँ । राष्ट्रिय स्वतन्त्र पार्टी (रास्वपा)ले आजदेखि आफ्ना जनप्रतिनिधिहरूलाई दोस्रो चरणको प्रशिक्षण कार्यक्रम सुरु गरेको छ । बजेट अधिवेशनलाई अझ प्रभावकारी बनाउने उद्देश्यले उक्त प्रशिक्षण आयोजना गरिएको सहमहामन्त्री विपिन कुमार आचार्यले जानकारी दिएका छन् ।
आचार्यका अनुसार आज र भोलि प्रशिक्षण कार्यक्रम सिंहदरबारस्थित रास्वपाको संसदीय दलको कार्यालयमा सञ्चालन हुनेछ । यसअघि चैत ३ र ४ गते ललितपुरको ग्वार्कोमा पहिलो चरणको आवासीय प्रशिक्षण सम्पन्न गरिएको थियो, जसमा विषयविज्ञ तथा पार्टीका शीर्ष नेताहरूले प्रशिक्षण दिएका थिए ।
यसअघि आयोजित कार्यक्रममा वरिष्ठ नेता बालेन शाह अनुपस्थित रहेको विषयले चर्चा पाएको थियो ।
गत फागुनमा सम्पन्न निर्वाचनमा रास्वपाले १८२ सिट जितेको थियो । धेरैजसो जनप्रतिनिधिहरू राजनीतिक, संवैधानिक तथा कानुनी विषयमा नयाँ भएकाले यस्ता प्रशिक्षण उपयोगी हुने पार्टीले विश्वास व्यक्त गरेको छ ।
प्रकाशित मिति: २६ बैशाख २०८३, शनिबार
प्रतिक्रिया