तेहरान। विश्वकै सबैभन्दा संवेदनशील समुद्री मार्गमध्ये एक स्ट्रेट अफ होर्मुज पार गर्दै कच्चा तेल बोकेका तीन वटा ट्याङ्कर सुरक्षित रूपमा गन्तव्यतर्फ अघि बढेका छन्।
अन्तर्राष्ट्रिय डाटा कम्पनीहरू केप्लर र एलएसईजीको तथ्यांकलाई उद्धृत गर्दै रोयटर्सले जनाएअनुसार, सम्भावित आक्रमण र सुरक्षा जोखिमबाट बच्न यी जहाजहरूले आफ्नो ट्र्याकिङ प्रणाली (ट्रान्सपोन्डर) बन्द गरेका थिए।
रिपोर्टअनुसार, आइतबार दुई विशाल तेलवाहक जहाजहरूले होर्मुज जलडमरू पार गरेका हुन्।
ती जहाजहरूमा इराकबाट लोड गरिएको करिब २०–२० लाख ब्यारेल कच्चा तेल रहेको बताइएको छ।
पहिलो जहाज “एगियोस फ्यानोरियस प्रथम” ले भियतनामतर्फ यात्रा गरिरहेको थियो।
यसले अप्रिल १७ मा इराकको बसरा मिडियम क्रुड लोड गरेपछि समुद्री मार्गमा कम्तीमा दुई पटक प्रवेश प्रयास गरे पनि असफल भएको विवरण सार्वजनिक भएको छ।
त्यस्तै, दोस्रो जहाज “कियारा एम” को अन्तिम गन्तव्य अझै स्पष्ट नभएको जनाइएको छ।
तेस्रो ट्याङ्करले भने अबुधाबीस्थित राष्ट्रिय तेल कम्पनीको जिर्कु टर्मिनलबाट मे १ मा करिब २० लाख ब्यारेल अपर जाकुम क्रुड लोड गरेको थियो।
केप्लरको तथ्यांक अनुसार उक्त जहाज केही दिनअघि नै स्ट्रेट अफ होर्मुज पार गरिसकेको छ।
विशेषज्ञहरूका अनुसार, होर्मुज जलडमरू विश्वको प्रमुख तेल ढुवानी मार्ग भएकाले यहाँ हुने कुनै पनि तनाव वा सैन्य जोखिमले अन्तर्राष्ट्रिय तेल बजारमा प्रत्यक्ष असर पार्न सक्छ।
त्यसैले जहाजहरूले ट्र्याकिङ बन्द गरेर यात्रा गर्नु असामान्य र जोखिमपूर्ण अभ्यासका रूपमा हेरिएको छ।
प्रकाशित मिति: २८ बैशाख २०८३, सोमबार
प्रतिक्रिया