काठमाडौं। चीनले मानवसहित नयाँ अन्तरिक्ष अभियान सञ्चालन गर्ने तयारी अन्तिम चरणमा पुगेको जनाएको छ।
चिनियाँ अधिकारीहरूका अनुसार अन्तरिक्षयान र त्यसलाई प्रक्षेपण गर्ने वाहक रकेटलाई उत्तरपश्चिम चीनस्थित जिउछ्वान उपग्रह प्रक्षेपण केन्द्रमा सफलतापूर्वक स्थानान्तरण गरिएको छ।
चिनियाँ अन्तरिक्ष निकायले प्रक्षेपणअघि आवश्यक प्राविधिक परीक्षण, उपकरण निरीक्षण तथा अन्तिम तयारी तीव्र रूपमा अघि बढाइएको जनाएको छ।
मौसम अवस्था र प्राविधिक मूल्याङ्कन उपयुक्त भएपछि अभियान प्रक्षेपण गरिने बताइएको छ।
यो अभियानलाई चीनको अन्तरिक्ष कार्यक्रमको अर्को महत्वपूर्ण उपलब्धिका रूपमा हेरिएको छ।
अभियानमार्फत अन्तरिक्ष यात्रीहरूलाई चीनको अन्तरिक्ष केन्द्रमा पठाइने अपेक्षा गरिएको छ।
पछिल्ला वर्षहरूमा चीनले अन्तरिक्ष प्रविधिमा उल्लेखनीय प्रगति गर्दै आफ्नै अन्तरिक्ष केन्द्र सञ्चालन गरिरहेको छ।
साथै, उसले नियमित रूपमा मानवसहितका अन्तरिक्ष अभियानहरू सञ्चालन गर्दै अन्तरिक्ष अनुसन्धानमा आफ्नो उपस्थिति बलियो बनाउँदै आएको छ।
जिउछ्वान प्रक्षेपण केन्द्र चीनको प्रमुख अन्तरिक्ष प्रक्षेपण स्थलमध्ये एक मानिन्छ।
विशेषगरी मानवसहितका अधिकांश अन्तरिक्ष अभियान यही केन्द्रबाट सञ्चालन हुने गरेका छन्।
यो अभियान सफल भएमा चीनको दीर्घकालीन अन्तरिक्ष योजना, अनुसन्धान र प्रविधि विकासमा थप उपलब्धि हासिल हुने विश्वास गरिएको छ।
प्रकाशित मिति: ३ जेष्ठ २०८३, आइतबार
प्रतिक्रिया