काठमाडौं । भूमि व्यवस्था, सहकारी तथा गरिबी निवारण मन्त्री प्रतिभा रावलले सुकुमबासी समस्या समाधानका लागि सरकारले नयाँ संरचनामार्फत काम अघि बढाएको र छिट्टै लालपुर्जा वितरण सुरु गरिने बताएकी छन्।
उनको सचिवालयले सार्वजनिक गरेको भिडियो सन्देशमा मन्त्री रावलले विगतमा अपनाइएका नीति र संरचनाहरू प्रभावकारी हुन नसकेको स्वीकार गरिन्। उनले पुरानो कार्यशैलीबाट अपेक्षित नतिजा नआएको उल्लेख गर्दै अब नयाँ ढाँचामा अघि बढ्न आवश्यक भएको बताइन्।
विगतका कमजोरीबाट पाठ सिक्दै सरकारले अध्यादेशमार्फत संरचनागत परिवर्तन गरेको र नयाँ संयन्त्र निर्माणको प्रक्रिया अगाडि बढिरहेको उनको भनाइ छ। ती संरचनाले छिट्टै परिणाम दिने विश्वास पनि उनले व्यक्त गरिन्।
मन्त्री रावलका अनुसार सरकारको प्राथमिकता अब केही हप्ताभित्रै सुकुमबासीलाई लालपुर्जा वितरण सुरु गर्ने रहेको छ।
उनले सहकारी क्षेत्रपछि सुकुमबासी समस्या समाधानलाई उच्च प्राथमिकतामा राखेर काम भइरहेको स्पष्ट पारिन्।
यस पहलले लामो समयदेखि जग्गाको स्वामित्व प्रमाणपत्रको प्रतीक्षामा रहेका सुकुमबासीहरूलाई राहत पुग्ने अपेक्षा गरिएको छ। यद्यपि, सुकुमबासी बस्तीमा डोजर चलाइएको विषयलाई लिएर सरकारमाथि आलोचना भइरहेको छ।
प्रकाशित मिति: ४ जेष्ठ २०८३, सोमबार
प्रतिक्रिया