काठमाडौं । डा. मनोजकुमार शर्मालाई प्रधानन्यायाधीशमा सिफारिस गरिएपछि उनीविरुद्ध १६ वटा उजुरी परेको छ । संसदीय सुनुवाइ समितिले २५ वैशाखमा १० दिनको समय दिएर उजुरी आह्वान गरेकोमा सोमबार कार्यालय समयभित्र उक्त उजुरी दर्ता भएका हुन् ।
समितिकी उपसचिव साबित्रा शर्माका अनुसार प्रस्तावित प्रधानन्यायाधीशविरुद्ध परेका उजुरीहरू मंगलबार बिहान ९ः४५ बजे बस्ने समितिको बैठकमा खोलिनेछ । त्यसपछि ती उजुरी अध्ययनका लागि सांसदहरूलाई वितरण गरिने जनाइएको छ ।
समितिले शर्माको कार्यकुशलता, कार्यसम्पादन, आचरणलगायत विषयमा ४ जेठसम्म उजुरी आह्वान गरेको थियो । यसअघि संवैधानिक परिषद्ले २४ वैशाखमा शर्मालाई प्रधानन्यायाधीश पदका लागि सिफारिस गरेको थियो ।
प्रकाशित मिति: ५ जेष्ठ २०८३, मंगलबार
प्रतिक्रिया