बेइजिङ। रुसी राष्ट्रपति भ्लादिमिर पुटिनको चीन भ्रमणका क्रममा रुस र चीनबीचको सम्बन्ध नयाँ चरणमा प्रवेश गरेको दाबी गरिएको छ ।
बेइजिङमा भएको विस्तारित वार्तामा रुसी राष्ट्रपति पुटिन र चिनियाँ राष्ट्रपति सी जिनपिङले द्विपक्षीय सहकार्यलाई थप विस्तार गर्ने सहमति व्यक्त गरेका छन् ।
दुवै नेताले सम्बन्धलाई रणनीतिक रूपमा अझ मजबुत बनाउँदै अन्तर्राष्ट्रिय मञ्चहरूमा सहकार्य जारी राख्ने प्रतिबद्धता जनाएका छन् ।
वार्ताका क्रममा राष्ट्रपति पुटिनले रुस–चीन साझेदारीलाई “उदाहरणीय सम्बन्ध” भन्दै प्रशंसा गरेका छन् ।
उनले दुई देशको साझा लक्ष्य रुसी र चिनियाँ जनताको समृद्धि भएको उल्लेख गर्दै सहकार्यलाई अझ गहिरो बनाउने संकेत गरे ।
त्यसैगरी चिनियाँ राष्ट्रपति सी जिनपिङले रुस–चीन सम्बन्ध निरन्तर प्रगति र तीव्र विकासको नयाँ चरणमा प्रवेश गरेको बताएका छन् ।
उनले दुई देशबीचको पारस्परिक विश्वास अझ बलियो हुँदै गएको र दीर्घकालीन, स्थिर तथा स्वस्थ सम्बन्ध प्रवर्द्धन गर्ने प्रतिबद्धता दोहोर्याए ।
वार्तालाई “वाइड फर्म्याट मिटिङ” भनिएको विस्तारित बैठकका रूपमा लिइएको छ, जसमा ऊर्जा, व्यापार, अन्तर्राष्ट्रिय राजनीति तथा बहुपक्षीय सहकार्यका विषयमा छलफल भएको अनुमान गरिएको छ ।
प्रकाशित मिति: ६ जेष्ठ २०८३, बुधबार
प्रतिक्रिया