जनकपुरधाम । राष्ट्रिय स्वतन्त्र पार्टी (रास्वपा) को बारास्थित कलैयामा आयोजित बैठकका क्रममा शनिबार विवाद उत्पन्न भएको छ । जिल्ला अधिवेशनको तयारीका विषयमा छलफल गर्न बोलाइएको कार्यक्रममा संस्थापन पक्षले दबाबमूलक व्यवहार गरेको आरोप लगाउँदै केही सहभागीले असन्तुष्टि जनाएपछि तनाव सिर्जना भएको हो ।
रास्वपाका प्रतिनिधिसभा सदस्य रहबर अन्सारीका अनुसार कार्यक्रम जिल्ला अधिवेशन केन्द्रित छलफलका लागि आयोजना गरिएको थियो । बैठकका क्रममा एक समूहले अवाञ्छित गतिविधि गर्दै वातावरण बिथोल्ने प्रयास गरे पनि कार्यक्रम निर्धारित कार्यसूचीअनुसार सम्पन्न भएको उनले बताए ।
अन्सारीले पार्टीबाट निष्कासित केही व्यक्तिहरूले होहल्ला गरेर कार्यक्रम प्रभावित पार्न खोजेको आरोप समेत लगाए । उनले सांसदहरूलाई कार्यक्रमस्थलबाट लखेटिएको भन्ने प्रचार निराधार रहेको जिकिर गरे ।
विवाद चर्किएपछि सुरक्षाका दृष्टिले प्रहरीले काठमाडौंबाट आएका अतिथिहरूलाई केही समय नजिकैको कोठामा बस्न सुझाव दिएको पनि उनले जानकारी दिए ।
उक्त कार्यक्रममा काठमाडौंबाट नेता राजन शर्मा, कामनी चौधरी लगायत मधेश प्रदेशका नेताहरूको उपस्थिति रहेको थियो ।
यसअघि वैशाख २७ गते रास्वपा केन्द्रीय समितिले बाराको जिल्ला कार्यसमिति विघटन गर्ने निर्णय गरेको थियो ।
प्रकाशित मिति: ९ जेष्ठ २०८३, शनिबार
प्रतिक्रिया