काठमाडौं। तालिमका क्रममा अचानक बेहोस भई उपचाररत सशस्त्र प्रहरी बल (एपीएफ) का जवानहरूको स्वास्थ्य अवस्था बुझ्न पूर्वगृहमन्त्री तथा प्रतिनिधि सभा सदस्य सुधन गुरुङ र सशस्त्र प्रहरी महानिरीक्षक (आईजीपी) नारायण दत्त पौडेल नेपाल एपीएफ अस्पताल बलम्बु पुगेका छन्।
उनिहरुले उपचाररत जवानहरूको स्वास्थ्य अवस्था, उपचार प्रक्रिया तथा चिकित्सकहरूले गरिरहेको निगरानीबारे विस्तृत जानकारी लिएका छन्।
अस्पताल भ्रमणका क्रममा पूर्वगृहमन्त्री गुरुङले बिरामी जवानहरूसँग प्रत्यक्ष भेट गर्दै शीघ्र स्वास्थ्य लाभको कामना गरेका थिए।
उनि नेपाली संस्कार र आत्मीयतालाई आत्मसाथ गर्दै फलफूल तथा पौष्टिक आहारसहित अस्पताल पुगेका हुन्।
गृह मन्त्रालयको जिम्मेवारीबाट बाहिरिएपछि पनि राष्ट्रसेवामा खटिएका सुरक्षाकर्मीहरूप्रति उनले देखाएका चासो, सद्भाव र अभिभावकत्वलाई अस्पताल परिसरमा उपस्थित सुरक्षाकर्मी तथा बिरामीका आफन्तहरूले सकारात्मक रूपमा लिएका छन्।
यस अवसरमा आईजीपी पौडेलले उपचारमा संलग्न चिकित्सकहरूसँग जवानहरूको स्वास्थ्य अवस्थाबारे जानकारी लिँदै आवश्यक उपचारमा कुनै कमी हुन नदिइने बताएका थिए।
अस्पताल प्रशासनका अनुसार उपचाररत जवानहरूको स्वास्थ्य अवस्था क्रमशः सुधारोन्मुख रहेको छ।
प्रकाशित मिति: ९ जेष्ठ २०८३, शनिबार
प्रतिक्रिया