काठमाडौँ । राष्ट्रिय स्वतन्त्र पार्टीको बारा जिल्ला भेलामा भएको विवादबारे पार्टीले स्पष्टोक्ति दिएको छ । पार्टीको मधेश प्रदेश कार्यालयले शनिबार भएको उक्त घटनाप्रति र सामाजिक सञ्जालमा फैलिएको समाचारप्रति गम्भीर ध्यानाकर्षण भएको जनाएको हो ।
रास्वपा मधेस प्रदेशका महामन्त्री मनिष कुमार साहले आज एक विज्ञप्ति जारी गर्दै कार्यक्रममा माननीय सांसदलाई ‘लखेटिएको’ भनी आएका समाचारहरू पूर्णतः सत्यताहीन, भ्रामक र गलत सूचना प्रवाह गर्ने नियतले प्रेरित रहेको स्पष्ट पारेका छन् ।
विज्ञप्तिमा उल्लेख भएअनुसार कार्यक्रमको अन्त्यमा अत्यधिक भिडका कारण माननीय सांसद तथा नेतागण बाहिरिने क्रममा केही मानिसहरू हलमा प्रवेश गरेका थिए । सोही भिडको भिडियोलाई गलत रूपमा प्रयोग गरी तथा पार्टीका सदस्यहरूको सामान्य मतभिन्नतालाई जोडेर पार्टीलाई बदनाम गर्ने नियतले दुष्प्रचार गरिएको पार्टीको दाबी छ ।
यस प्रकारका अपुष्ट र भ्रामक समाचारले राजनीतिक संस्कार, सामाजिक सद्भाव र जनविश्वासमा नकारात्मक असर पार्ने भन्दै रास्वपाले सत्यतथ्य बुझेर मात्रै समाचार सम्प्रेषण गर्न सञ्चार माध्यम तथा सामाजिक सञ्जाल प्रयोगकर्ताहरूलाई आग्रह गरेको छ ।
पार्टी सधैं पारदर्शिता, सत्य सूचना र लोकतान्त्रिक मूल्य मान्यताप्रति प्रतिबद्ध रहेको विज्ञप्तिमा जनाइएको छ ।
प्रकाशित मिति: ९ जेष्ठ २०८३, शनिबार
प्रतिक्रिया