काठमाडौं । रौतहट र सिन्धुलीको सीमाक्षेत्रमा पर्ने बागमती नदी किनारमा दुई युवाको शव फेला परेको छ । मृत्यु हुनेमा सर्लाहीको लालबन्दी नगरपालिका–९ बस्तीपुरका १८ वर्षीय रोहित महतो र लालबन्दी–६ ढुकढुकी एफएम टोलका २० वर्षीय गणेश महतो रहेका छन् ।
जिल्ला प्रहरी कार्यालय सर्लाहीका डीएसपी सरोज राईका अनुसार जेठ ९ गते घरबाट घुम्न निस्किएका उनीहरूको शव बागमती नदी किनारमा फेला परेको हो । प्रारम्भिक अनुसन्धानबाट नदी तर्ने क्रममा डुबेर उनीहरूको मृत्यु भएको अनुमान गरिएको प्रहरीले जनाएको छ ।
उनीहरूसँगै गएका अन्य तीन जना भने सकुशल फर्किएका छन् । घटनापछि इलाका प्रहरी कार्यालय हरिवन र कर्मैयाबाट खटिएको प्रहरी टोलीले शव नदीबाट बाहिर निकालेर पोस्टमार्टमका लागि प्रादेशिक अस्पताल मलंगवा पठाएको छ ।
घटनाबारे थप अनुसन्धान भइरहेको प्रहरीले जनाएको छ ।
प्रकाशित मिति: १० जेष्ठ २०८३, आइतबार
प्रतिक्रिया