काठमाडौं । सिरहामा दलित महिलामाथि कुटपिट गरेको आरोपमा प्रहरीले एक जनालाई पक्राउ गरेको छ। नरहा गाउँपालिका–३ का ५५ वर्षीय पवित्रनारायण यादवलाई शनिबार साँझ नयाँ चोहर्वाबाट पक्राउ गरिएको प्रहरीले जनाएको छ।
यादवमाथि स्थानीय ६० वर्षीया फूलकुमारी मण्डललाई कुटपिट गरेको आरोप लागेको छ। प्रहरीका अनुसार गत २७ वैशाखमा आफ्नी भैँसी यादवको खेतमा गएको विषयलाई लिएर मण्डलमाथि कुटपिट भएको थियो।
घटनापछि पीडित मण्डलले आफूमाथि अन्याय भएको भन्दै जिल्ला प्रहरी कार्यालयमा अभद्र व्यवहारसम्बन्धी कसुरमा जाहेरी दर्ता गराएकी थिइन्। सोही जाहेरीका आधारमा जिल्ला प्रशासन कार्यालय सिरहाबाट पक्राउ पुर्जी लिएर इलाका प्रहरी कार्यालय चोहर्वाको टोलीले यादवलाई नियन्त्रणमा लिएको हो।
पक्राउ परेका यादवलाई हाल हिरासतमा राखी थप अनुसन्धान भइरहेको जिल्ला प्रहरी कार्यालय सिरहाले जनाएको छ।
प्रकाशित मिति: ११ जेष्ठ २०८३, सोमबार
प्रतिक्रिया