काठमाडौं । नेपाली कांग्रेसका नेता डा. शेखर कोइराला ले पार्टी एकताका लागि विभिन्न प्रस्ताव अघि सारेका छन् । उनले १५औँ महाधिवेशनका लागि क्रियाशील सदस्यता अद्यावधिक अनिवार्य नगर्नुपर्ने धारणा राखेका हुन् ।
शेखर कोइराला ले १४औँ महाधिवेशनपछि नवीकरण तथा वितरण गरिएका क्रियाशील सदस्यताकै आधारमा १५औँ महाधिवेशन सम्पन्न गर्न प्रस्ताव गरेका छन् । साथै, १४औँ महाधिवेशनबाट निर्वाचित केन्द्रीय कार्यसमिति र विशेष महाधिवेशनबाट बनेको कार्यसमितिलाई समायोजन गरी एउटै बनाइनुपर्ने उनको भनाइ छ ।
उनले कार्यसम्पादन समितिमा सभापतिको बहुमत रहने गरी गठन गर्नुपर्ने प्रस्ताव पनि अघि सारेका छन् । त्यस्तै, निर्वाचन समिति, क्रियाशील सदस्यता छानबिन समिति, अनुशासन समिति, विधान समिति लगायतका अन्य समितिहरू आपसी सहमतिका आधारमा मात्रै गठन गर्नुपर्ने उनको धारणा छ ।
यसअघि सोमबार बसेको नेपाली कांग्रेसको सदस्यता व्यवस्थापन केन्द्रीय समितिको बैठकले भने सबै पुराना सदस्यतालाई मान्यता नदिने निर्णय गरिसकेको छ । बैठकले क्रियाशील सदस्यता अद्यावधिक प्रक्रियालाई सहज र तीव्र बनाउन सातै प्रदेशमा जिम्मेवारीसमेत तोकेको छ ।
प्रकाशित मिति: ११ जेष्ठ २०८३, सोमबार
प्रतिक्रिया