काठमाडौं । काठमाडौँ महानगरपालिकाले गोरखा मिडिया नेटवर्क प्रालिद्वारा सञ्चालित ग्यालेक्सी ४ के टेलिभिजनलाई आफ्ना सामानहरू लैजान र घरधनीलाई तिर्नुपर्ने बाँकी भाडा रकम बुझाउन १५ दिनको अन्तिम समय दिएको छ ।
महानगरको कानुन तथा मानव अधिकार विभागले सार्वजनिक सूचना जारी गर्दै तोकिएको समयभित्र सामान नहटाइए लिलाम प्रक्रिया अघि बढाइने चेतावनी दिएको छ ।
काठमाडौँ महानगरपालिका वडा नं. ३ का घरधनी मृगेन्द्रप्रसाद मिश्रले जीबी राई अध्यक्ष रहेको गोरखा मिडिया नेटवर्कविरुद्ध घर खाली गराइदिन र भाडा असुल गराइदिन माग गर्दै मुद्दा दायर गरेका थिए । सो मुद्दामा महानगरको न्यायिक समितिले २०८१ कात्तिक १४ गते घर खाली गराउने र बाँकी भाडा तथा कर तिर्नुपर्ने निर्णय गरेको थियो ।
उक्त निर्णय कार्यान्वयन नभएपछि उच्च अदालत पाटनले २०८२ साउन २८ गते दुई महिनाभित्र निर्णय कार्यान्वयन गर्न परमादेश जारी गरेको थियो । त्यसपछि महानगरको टोलीले २०८२ कात्तिक १४ गते घर खाली गराएको थियो ।
घर खाली गराएको करिब ६ महिना बितिसक्दा पनि ग्यालेक्सी चार के टेलिभिजनका सामग्रीहरू अझै सोही स्थानमै रहेका छन् । घरधनी मृगेन्द्र मिश्रले ती सामान लिलाम गरिदिन माग गर्दै महानगरमा निवेदन दिएका थिए ।
सोही निवेदनका आधारमा महानगरले १५ दिने सार्वजनिक सूचना जारी गरेको हो । सूचनामा तोकिएको अवधिभित्र बाँकी भाडा बुझाएर सामान नलगेमा प्रचलित कानुनअनुसार ती सामग्री लिलाम गरिने उल्लेख छ ।
सहकारी ठगी प्रकरणमा मुछिएका जीबी राई हाल फरार रहेका छन् भने ग्यालेक्सी ४ के टेलिभिजन हाल बन्द अवस्थामा रहेको छ ।
प्रकाशित मिति: १२ जेष्ठ २०८३, मंगलबार
प्रतिक्रिया