बुटवल । कपिलवस्तुको महाराजगञ्ज नगरपालिका–४ बरईपुरस्थित तौलिहवा–बहादुरगञ्ज हुलाकी सडकखण्डमा मंगलबार बिहान यात्रुवाहक बस दुर्घटना हुँदा ३८ जना घाइते भएका छन् । काठमाडौंबाट सुर्खेततर्फ जाँदै गरेको कर्णाली प्रदेश ०२–००१ ख १२६६ नम्बरको बस अनियन्त्रित भएर सडकमा पल्टिएको प्रहरीले जनाएको छ ।
दुर्घटनालगत्तै स्थानीयवासी र प्रहरीको सहयोगमा घाइतेहरूको उद्धार गरी जिल्ला अस्पताल तौलिहवामा उपचारका लागि लगिएको थियो । घाइतेमध्ये ३५ जनालाई थप उपचार आवश्यक परेपछि भैरहवास्थित विभिन्न अस्पतालमा रिफर गरिएको प्रहरीले जानकारी दिएको छ ।
प्रहरीका अनुसार दुर्घटनामा घाइते भएका बर्दियाकी ४५ वर्षीया पवित्रा देवकोटा र सुर्खेतका ३० वर्षीय प्रकाश विकको अवस्था गम्भीर रहेको छ ।
बस चालक सुर्खेतका ३० वर्षीय डिल्लीप्रसाद दाहाल, सहचालक राजन बुढासहित अधिकांश यात्रुको शरीरका विभिन्न भागमा चोट लागेको छ । दुर्घटनामा सुर्खेत, दैलेख, कालीकोट, जुम्ला, बाँके, झापा, काठमाडौं, ललितपुर र ओखलढुंगालगायत जिल्लाका यात्रु घाइते भएका छन् ।
प्रहरीले दुर्घटनाको कारणबारे अनुसन्धान सुरु गरेको जनाएको छ ।
प्रकाशित मिति: १२ जेष्ठ २०८३, मंगलबार
प्रतिक्रिया