काठमाडौं। नेपाली कांग्रेसबाट निर्वाचित दुई जना वडा अध्यक्षको पद रिक्त भएको छ।
दल परिवर्तन गरेको आधारमा निर्वाचन आयोगले उनीहरूको पद खारेज भएको सूचना जारी गरेको हो।
पद गुमाउनेमा लुम्बिनी प्रदेशको मुसिकोट नगरपालिका–२ का वडा अध्यक्ष रविन्द्र केसी र धुर्कोट गाउँपालिका–३ का वडा अध्यक्ष पद्मबहादुर विष्ट रहेका छन्।
उनीहरू २०७९ सालको स्थानीय तह निर्वाचनमा नेपाली कांग्रेसको तर्फबाट निर्वाचित भएका थिए।
नेपाली कांग्रेसले दुवै जनप्रतिनिधि अर्को राजनीतिक दलमा आबद्ध भएको जानकारी केन्द्रीय कार्यसम्पादन समितिको निर्णयसहित निर्वाचन आयोगलाई पठाएको थियो।
त्यसपछि आयोगले कानुनी व्यवस्था अनुसार उनीहरूको पद रिक्त भएको घोषणा गरेको हो।
स्थानीय तह सम्बन्धी कानुनी प्रावधानअनुसार कुनै जनप्रतिनिधि आफू निर्वाचित भएको दल छाडेर अर्को दलमा प्रवेश गरेमा उसको पद स्वतः रिक्त हुने व्यवस्था रहेको छ।
प्रकाशित मिति: १४ जेष्ठ २०८३, बिहिबार
प्रतिक्रिया