काठमाडौं। नेपाली कम्युनिस्ट पार्टीका नेता राजेन्द्रप्रसाद पाण्डे ले वर्तमान सरकार सुकुम्बासी, गरिब तथा निमुखा वर्गको हितविपरीत काम गरिरहेको आरोप लगाएका छन्।
उनले अहिलेको सत्ता संरचना योजनाबद्ध राजनीतिक षड्यन्त्रको परिणामस्वरूप स्थापित भएको दाबी गर्दै सरकारप्रति तीव्र असन्तुष्टि व्यक्त गरेका हुन्।
शनिबार काठमाडौंमा आयोजित अखिल नेपाल महिला सङ्गठन एकताको राष्ट्रिय भेलालाई सम्बोधन गर्दै नेता पाण्डेले वर्तमान राजनीतिक परिस्थितिप्रति प्रश्न उठाएका थिए।
उनले सरकार गठनको पृष्ठभूमिलाई विवादास्पद भन्दै जनताबाट निर्वाचित संस्थाहरूलाई कमजोर बनाउने प्रयास भएको आरोप लगाए।
उनका अनुसार वि.सं. २०८२ साल भदौ २३ र २४ गते भएको भनिएको ‘जेनजी आन्दोलन’ देशलाई अस्थिर बनाउने योजनाबद्ध गतिविधिको हिस्सा थियो।
उक्त घटनाका क्रममा विभिन्न सरकारी निकाय, संवैधानिक संस्थाहरू तथा राजनीतिक दलका नेताहरूका घरमा आगजनी र तोडफोड भएको दाबी गर्दै उनले त्यसलाई लोकतान्त्रिक अभ्यासभन्दा बाहिरको गतिविधिका रूपमा चित्रण गरे।
पाण्डेले सोही घटनालाई आधार बनाएर निर्वाचित संसद् विघटन गरिएको र जनमतबाट नआएको शक्तिलाई सत्तामा पुर्याउने खेल भएको आरोप लगाए।
उनका अनुसार कुनै स्पष्ट विचार, सिद्धान्त वा राजनीतिक लक्ष्य नभएका समूहलाई राज्य सञ्चालनको जिम्मेवारी सुम्पिनु लोकतान्त्रिक मूल्य–मान्यताविपरीत कदम हो।
सम्बोधनका क्रममा उनले विगतका राजनीतिक आन्दोलनहरूको स्मरण गर्दै कम्युनिस्ट तथा लोकतान्त्रिक शक्तिहरूले निरङ्कुश पञ्चायती व्यवस्था अन्त्य गर्न र राजतन्त्रविरुद्ध लामो संघर्ष गरेको बताए।
त्यही संघर्षको उपलब्धिमाथि अहिलेका शासकहरूले उचित सम्मान नगरेको उनको भनाइ थियो।
“हामीले जेल, यातना, भूमिगत जीवन, जनआन्दोलन र जनयुद्धका कठिन अनुभवबाट यो राजनीतिक परिवर्तन सम्भव बनाएका हौँ,” उनले भने, “तर आज त्यही इतिहाससँग कुनै सम्बन्ध नराख्ने शक्तिहरू राज्य सञ्चालनको केन्द्रमा पुगेका छन्।”
पाण्डेले वर्तमान सरकारको नीतिका कारण गरिब, मजदुर, किसान, सुकुम्बासी र निमुखा समुदाय सबैभन्दा बढी प्रभावित भएको दाबी गरे।
सामाजिक न्याय र समानताको पक्षमा उभिनुपर्ने राज्य संयन्त्र उल्टै कमजोर वर्गप्रति कठोर बन्दै गएको उनको आरोप थियो।
उनले वर्तमान चुनौतीको सामना गर्न कम्युनिस्ट शक्तिहरू पुनः संगठित हुनुपर्ने आवश्यकता औँल्याए।
पार्टी कार्यकर्ताहरूलाई विगतका कमजोरीहरूको आत्मसमीक्षा गर्दै नयाँ ऊर्जा र प्रतिबद्धतासहित जनतामाझ फर्किन आह्वान गर्दै उनले बलियो वैचारिक आधारसहित पार्टी पुनर्निर्माण गर्नुपर्ने बताए।
पार्टी एकताको विषयमा बोल्दै पाण्डेले शीर्ष तहमा एकता भए पनि तल्लो तहसम्म पूर्ण रूपमा भावनात्मक र संगठनात्मक एकता स्थापित हुन नसकेको स्वीकार गरे।
उनले पूर्वमाओवादी र पूर्वएकीकृत समाजवादी पृष्ठभूमिका कार्यकर्ताहरूलाई पुराना विभाजन र संकुचित सोचबाट माथि उठेर साझा कम्युनिस्ट लक्ष्यका साथ अघि बढ्न आग्रह गरे।
उनको भनाइमा आगामी दिनमा पार्टीलाई थप सुदृढ, जनमुखी र संघर्षशील बनाउँदै जनताको अधिकार, सामाजिक न्याय र समावेशी विकासको पक्षमा नयाँ राजनीतिक अभियान अघि बढाइनेछ।
प्रकाशित मिति: १६ जेष्ठ २०८३, शनिबार
प्रतिक्रिया