काठमाडौं। हर्क साम्पाङ नेतृत्वको श्रम संस्कृति पार्टीले प्रधानमन्त्रीले प्रतिनिधिसभामा दिएको अभिव्यक्तिप्रति गम्भीर आपत्ति जनाउँदै त्यसको कडा भर्त्सना गरेको छ। पार्टीले प्रधानमन्त्रीको भनाइलाई राष्ट्रिय हितविपरीत रहेको दाबी गर्दै ‘राष्ट्रघाती बदनियत’ को संज्ञा दिएको छ।
अध्यक्ष हर्क साम्पाङद्वारा जारी प्रेस विज्ञप्तिमा प्रधानमन्त्रीले संसद्मा दिएको अभिव्यक्तिले नेपालको सीमा र भौगोलिक अखण्डतासँग सम्बन्धित संवेदनशील विषयमा अनावश्यक विवाद सिर्जना गरेको उल्लेख गरिएको छ। पार्टीले प्रधानमन्त्रीको भनाइले नेपाली जनताको राष्ट्रिय भावनामा आघात पुगेको दाबी गरेको छ।
विज्ञप्तिअनुसार पूर्वनिर्धारित कार्यतालिकाबिना नै जेठ १७ गते संसद्को बैठक बोलाइएको र त्यसको भोलिपल्ट राष्ट्रिय स्वतन्त्र पार्टी (रास्वपा) का सभापति भारत भ्रमणमा निस्किएको घटनालाई पार्टीले अर्थपूर्ण रूपमा हेरेको जनाएको छ। रास्वपाका सभापति भारत जानुअघि प्रधानमन्त्री एकाएक संसद्मा उपस्थित भई भारतसँग सम्बन्धित विषयमा अभिव्यक्ति दिएको भन्दै पार्टीले त्यसप्रति शंका व्यक्त गरेको छ।
श्रम संस्कृति पार्टीले संसद्को रोस्टममा उभिएर प्रधानमन्त्रीले ‘नेपालले भारतको भूमि धेरै ठाउँमा मिचेको छ’ भन्ने आशयको अभिव्यक्ति दिएको उल्लेख गर्दै त्यसले सीमा विवादको विषयलाई कमजोर पार्ने प्रयास भएको आरोप लगाएको छ। पार्टीका अनुसार यस्तो अभिव्यक्तिले लिपुलेक, लिम्पियाधुरा लगायतका नेपाली भूमि फिर्ता हुनुपर्छ भन्ने नेपाली जनताको लामो समयदेखिको मागलाई ओझेलमा पार्ने खतरा उत्पन्न गरेको छ।
विज्ञप्तिमा नेपालको सीमा सम्बन्धी विषय राष्ट्रिय स्वाभिमानसँग जोडिएको संवेदनशील मुद्दा भएकाले प्रधानमन्त्री जस्तो उच्च पदमा बसेका व्यक्तिले अत्यन्त जिम्मेवारीपूर्वक धारणा सार्वजनिक गर्नुपर्ने उल्लेख गरिएको छ। प्रधानमन्त्रीको भनाइले अन्तर्राष्ट्रिय समुदायमा नेपालको आधिकारिक अडानबारे भ्रम सिर्जना गर्न सक्ने पार्टीको तर्क छ।
पार्टीले सरकारमाथि नेपाली सेनाको भूमिकालाई समेत कमजोर बनाएको आरोप लगाएको छ। सीमा सुरक्षाको विषयमा सेनालाई प्रभावकारी रूपमा परिचालन नगरेको भन्दै विज्ञप्तिमा असन्तुष्टि व्यक्त गरिएको छ। देशको भौगोलिक अखण्डता र राष्ट्रिय सुरक्षासँग सम्बन्धित सवालमा सरकार गम्भीर नभएको आरोप पनि पार्टीले लगाएको छ।
श्रम संस्कृति पार्टीले वर्तमान सरकार र प्रधानमन्त्री नेपालको सीमा रक्षा तथा राष्ट्रिय स्वाभिमानप्रति पर्याप्त प्रतिबद्ध नरहेको दाबी गर्दै यस घटनाले त्यसको पुष्टि गरेको जनाएको छ। पार्टीले प्रधानमन्त्रीको अभिव्यक्तिप्रति घोर आपत्ति प्रकट गर्दै सरकारलाई राष्ट्रिय हित र संवेदनशील कूटनीतिक विषयमा जिम्मेवार बन्न आग्रह गरेको छ।
साथै, सीमा सम्बन्धी विषयमा स्पष्ट राष्ट्रिय अडान कायम राख्न, नेपाली भूमिसँग सम्बन्धित मुद्दामा कुनै पनि प्रकारको सम्झौता नगर्न तथा जनभावनाको सम्मान गर्न सरकारसँग माग गरिएको छ। पार्टीले राष्ट्रिय हितविपरीत हुने कुनै पनि गतिविधि वा अभिव्यक्तिविरुद्ध निरन्तर आवाज उठाइरहने चेतावनीसमेत दिएको छ।
प्रकाशित मिति: १८ जेष्ठ २०८३, सोमबार
प्रतिक्रिया