काठमाडौं। श्रम संस्कृति पार्टीका अध्यक्ष हर्क साम्पाङले प्रतिनिधिसभामा प्रधानमन्त्री बालेन्द्र शाहको उपस्थिति लाई लिएर प्रश्न उठाएका छन्।
प्रतिनिधिसभा नियमावलीको प्रावधानलाई उल्लेख गर्दै साम्पाङले संसद् बैठकमा हाजिर गर्ने प्रक्रिया अनिवार्य हुने तर्क प्रस्तुत गरेका छन्।
उनका अनुसार सांसदहरूले बैठकमा उपस्थित हुनुअघि विद्युतीय प्रणाली वा हाजिरी पुस्तिकामा उपस्थिति जनाउनुपर्ने व्यवस्था छ।
साम्पाङले यही व्यवस्थालाई आधार मानेर प्रधानमन्त्री शाहले संसद्मा हाजिर गरे वा नगरे भन्ने विषय स्पष्ट हुनुपर्ने माग गरेका छन्।
उनले हाजिर नगरेको अवस्थामा सम्बन्धित व्यक्तिको सांसद पद स्वतः मान्य नहुने र त्यसअनुसार प्रधानमन्त्री पदसमेत स्वतः रहन नसक्ने दाबी गरेका छन्।
उनले संसद् बैठकमा उपस्थितिको विषय केवल औपचारिक प्रक्रिया नभई संवैधानिक जिम्मेवारीसँग जोडिएको विषय भएको बताएका छन्।
यसका साथै साम्पाङले नेपाल–भारत सीमा सम्बन्धी विषयमा पनि प्रधानमन्त्रीले स्पष्ट विवरण दिनुपर्ने माग गरेका छन्।
यदि नेपालले भारतको कुनै भूमि मिचेको भन्ने भनाइ प्रमाणित गर्न सकिन्छ भने त्यसबारे संसद्मा तथ्यसहित जानकारी दिनुपर्ने उनको भनाइ छ।
गल्ती भएको अवस्थामा प्रधानमन्त्रीले सार्वजनिक रूपमा माफी माग्नुपर्ने पनि उनले बताएका छन्।
संसद्मा सीमा विवाद र प्रधानमन्त्रीको अभिव्यक्तिलाई लिएर जारी बहसका बीच विभिन्न राजनीतिक दल र नेताहरूले आ–आफ्ना धारणा राखिरहेका छन्, जसका कारण संसदीय वातावरण थप तनावपूर्ण बनेको छ।
प्रकाशित मिति: १९ जेष्ठ २०८३, मंगलबार
प्रतिक्रिया