काठमाडौं। पूर्वगृहमन्त्री सुधन गुरुङ माथि छानबिन गर्न गठित समितिले आफ्नो प्रतिवेदन प्रधानमन्त्री बालेन्द्र शाहलाई बुझाएको छ।
समितिले शुक्रबार सिंहदरबारस्थित प्रधानमन्त्री तथा मन्त्रिपरिषद्को कार्यालयमा प्रतिवेदन बुझाएको हो। जेठ १८ गते कार्यकाल सकिएको समितिले थप पाँच दिनको म्याद लिएर प्रतिवेदनलाई अन्तिम रूप दिएको थियो।
अकुत सम्पत्ति आर्जन गरेको, त्यसको स्रोत खुलाउन नसकेको तथा विवादित व्यवसायी दीपक भट्टसँग साझेदारी रहेको तथ्य सार्वजनिक भएपछि गुरुङले वैशाख ९ गते गृहमन्त्री पदबाट राजीनामा दिएका थिए।
उनको छानबिनका लागि सरकारले वैशाख २८ गते उच्च अदालतका पूर्वन्यायाधीश अच्युतप्रसाद भण्डारीको अध्यक्षतामा तीन सदस्यीय छानबिन समिति गठन गरेको थियो। समितिमा महालेखा नियन्त्रक शोभाकान्त पौडेल र महान्यायाधिवक्ता कार्यालयका सहन्यायाधिवक्ता अच्युतमणि न्यौपाने सदस्य रहेका थिए।
स्रोतका अनुसार समितिले गुरुङमाथि लगाइएका आरोपहरूबाट सफाइ दिने निष्कर्षसहित प्रतिवेदन तयार पारेको छ। प्रतिवेदनको पूर्ण विवरण भने सार्वजनिक गरिएको छैन।
प्रकाशित मिति: २२ जेष्ठ २०८३, शुक्रबार
प्रतिक्रिया