काठमाडौं । काभ्रेपलाञ्चोकको नमोबुद्ध नगरपालिका–२ बुचाकोटमा भएको बस दुर्घटनामा ज्यान गुमाउनेको संख्या आठ पुगेको छ।
बनेपाबाट रोशी गाउँपालिकाको खार्पाचोकतर्फ जाँदै गरेको बा.३ ख ८३९८ नम्बरको यात्रुवाहक बस शुक्रबार दुर्घटनाग्रस्त भएको हो। जिल्ला प्रहरी कार्यालय काभ्रेका डीएसपी रविन विष्टका अनुसार दुर्घटनामा आठ जनाको मृत्यु भएको पुष्टि भएको छ।
दुर्घटनामा घाइते भएका १६ जनाको धुलिखेल अस्पतालमा उपचार भइरहेको छ। केही घाइतेको अवस्था गम्भीर रहेकाले मृतकको संख्या थप अद्यावधिक हुन सक्ने प्रहरीले जनाएको छ।
प्रहरीका अनुसार अरनिको यातायातको उक्त बस बीपी राजमार्गबाट करिब २०० मिटर तल खसेको थियो। दुर्घटनाको कारणबारे अनुसन्धान भइरहेको छ।
दुर्घटनालगत्तै प्रहरी, स्थानीयवासी तथा उद्धारकर्मीहरू घटनास्थलमा परिचालित भएका थिए। मृतकहरूको पहिचान तथा घटनाको विस्तृत विवरण संकलन गर्ने कार्य जारी रहेको प्रहरीले जनाएको छ।
प्रकाशित मिति: २९ जेष्ठ २०८३, शुक्रबार
प्रतिक्रिया