काठमाडौं । राष्ट्रिय स्वतन्त्र पार्टी (रास्वपा) की समानुपातिक सांसद सृष्टी भट्टराईको एक भिडियो सामाजिक सञ्जालमा व्यापक रूपमा चर्चामा आएको छ। भिडियोमा उनी गुडिरहेको सवारीसाधनको झ्यालतर्फ बाहिर निस्किएको अवस्थामा देखिएकी छन्।
गत मार्च ५ मा उनको इन्स्टाग्राम खातामार्फत सार्वजनिक गरिएको उक्त भिडियो अहिले विभिन्न सामाजिक सञ्जाल प्लेटफर्ममा पुनः भाइरल भइरहेको छ। भिडियोमा अंग्रेजी गीत समावेश गरिएको छ भने क्याप्सनमा उनले ‘निर्दोषता फेरि फुलोस्, जसलाई कसैले कुचल्न नसकोस्, र न्याय यति बलियो बनोस् कि मानवताले फेरि कहिल्यै हार नमानोस्’ भन्ने भाव व्यक्त गरेकी छन्।
भिडियो सार्वजनिक भएपछि सामाजिक सञ्जाल प्रयोगकर्ताहरूले यसलाई ट्राफिक सुरक्षासम्बन्धी नियमविपरीत गतिविधि भएको दाबी गर्दै सम्बन्धित निकायको ध्यानाकर्षण गराएका छन्। कतिपय प्रयोगकर्ताले नेपाल प्रहरीलाई सामाजिक सञ्जालमार्फत मेन्सन गर्दै आवश्यक छानबिन र कारबाहीको माग गरेका छन्।
सामाजिक सञ्जालमा उठेका प्रतिक्रियाहरूमा सार्वजनिक पदमा रहेका व्यक्तिहरूले कानुन र सुरक्षासम्बन्धी नियमको पालना गर्न अझ बढी जिम्मेवार हुनुपर्ने धारणा व्यक्त गरिएको छ।
यसअघि पनि ट्राफिक नियम उल्लंघनसम्बन्धी विषयमा सामाजिक सञ्जालमा व्यापक चर्चा भएपछि श्रम संस्कृति पार्टीका अध्यक्ष हर्क साम्पाङलाई ट्राफिक प्रहरीले जरिवाना गरेको घटना सार्वजनिक भएको थियो। त्यस घटनालाई स्मरण गर्दै केही प्रयोगकर्ताले समान प्रकृतिका घटनामा समान व्यवहार हुनुपर्ने माग गरेका छन्।
यद्यपि, यस विषयमा सम्बन्धित निकायबाट औपचारिक रूपमा कुनै निर्णय वा कारबाहीबारे जानकारी सार्वजनिक भइसकेको छैन।
प्रकाशित मिति: २ असार २०८३, मंगलबार
प्रतिक्रिया