काठमाडौं । निर्वाचन आयोगले अन्य राजनीतिक दलमा प्रवेश गरेको आधारमा जुम्लाको गुठीचौर गाउँपालिकाका अध्यक्ष दानबहादुर बुढासहित तीन जना जनप्रतिनिधिको पद रिक्त भएको घोषणा गरेको छ।
नेपाली कांग्रेसबाट निर्वाचित गुठीचौर गाउँपालिका अध्यक्ष बुढा हालै राष्ट्रिय स्वतन्त्र पार्टी (रास्वपा) मा प्रवेश गरेपछि उनको पद स्वतः रिक्त भएको आयोगले जनाएको छ।
आयोगका अनुसार राजनीतिक दल सम्बन्धी ऐन, २०७३ र राजनीतिक दल सम्बन्धी नियमावली, २०७४ मा भएको व्यवस्थाअनुसार दल त्याग गरेको आधारमा उनको पद रिक्त गरिएको हो।
यससँगै पश्चिम नवलपरासीको पाल्हीनन्दन गाउँपालिकाकी उपाध्यक्ष फातिमा खातुन अन्सारी र रुपन्देहीको बुटवल उपमहानगरपालिका–३ का वडा अध्यक्ष विष्णु ढकालको पद पनि रिक्त भएको घोषणा गरिएको छ। उनीहरू दुवै नेपाली कांग्रेसबाट निर्वाचित जनप्रतिनिधि हुन्।
नेपाली कांग्रेसको केन्द्रीय कार्यसम्पादन समितिले सम्बन्धित जनप्रतिनिधिहरूले पार्टी परित्याग गरी अन्य दलमा आबद्ध भएको जानकारी निर्वाचन आयोगलाई गराएको थियो। सोही जानकारीका आधारमा आयोगको असार ८ गते बसेको बैठकले उनीहरूको पद रिक्त गर्ने निर्णय गरेको जनाएको छ।
आयोगले जारी गरेको सूचनाअनुसार दल परिवर्तन गरेका जनप्रतिनिधिहरूको पद कानुनी व्यवस्थाअनुसार स्वतः रिक्त हुने प्रावधान कार्यान्वयन गरिएको हो।
प्रकाशित मिति: ९ असार २०८३, मंगलबार
प्रतिक्रिया