काठमाडौं । त्रिभुवन विश्वविद्यालय (त्रिवि) सेवा आयोगको अध्यक्षमा नेपाल सरकारका पूर्वसचिव तथा वरिष्ठ शहरी योजनाविद् किशोर थापा नियुक्त भएका छन्। प्रधानमन्त्री तथा त्रिभुवन विश्वविद्यालयका कुलपति बालेन्द्र शाहले थापालाई अध्यक्षमा नियुक्त गरेका हुन्।
त्यस्तै, सेवा आयोगको सदस्यमा प्रा. डा. रेजिना मास्के नियुक्त भएकी छन्। विश्वविद्यालय स्रोतका अनुसार सेवा आयोगलाई प्रभावकारी, पारदर्शी र योग्य जनशक्तिमैत्री बनाउने उद्देश्यका साथ दुवै नियुक्ति गरिएको हो।
शिक्षा तथा खेलकुदमन्त्री एवं त्रिविका सहकुलपति सस्मित पोखरेलको नेतृत्वमा गठित सिफारिस समितिले आवेदन, योग्यता, अनुभव र अन्तर्वार्ताका आधारमा तीन जनाको नाम कुलपतिसमक्ष सिफारिस गरेको थियो। सोही सिफारिसका आधारमा थापालाई अध्यक्षमा नियुक्त गरिएको हो।
करिब चार दशक निजामती सेवामा कार्यरत थापाले शहरी विकास, शिक्षा, संस्कृति, पर्यटन तथा नागरिक उड्डयन मन्त्रालयलगायत विभिन्न निकायमा सचिवका रूपमा जिम्मेवारी सम्हालिसकेका छन्। उनी राष्ट्रिय आवास योजना, राष्ट्रिय शहरी विकास रणनीति तथा विभिन्न सरकारी नीतिको निर्माण र कार्यान्वयनमा समेत नेतृत्वदायी भूमिकामा रहेका थिए।
प्रकाशित मिति: १७ असार २०८३, बुधबार
प्रतिक्रिया