दुबई। इरानका दिवंगत सर्वोच्च नेता अयातुल्ला अली खामेनीको अन्त्येष्टि चलिरहेका बेला विश्व ऊर्जा आपूर्तिको प्रमुख समुद्री मार्ग हर्मुज जलघाँटीमा फेरि एकपटक ट्यांकरमाथि आक्रमण भएको छ। घटनापछि क्षेत्रीय सुरक्षा र विश्व ऊर्जा बजारप्रति चिन्ता थप बढेको छ।
बेलायतको युनाइटेड किङडम मेरिटाइम ट्रेड अपरेसन्स (यूकेएमटीओ) का अनुसार ओमानको लिमाह तट नजिक दक्षिणतर्फ गइरहेको तरलीकृत प्राकृतिक ग्यास (एलएनजी) बोकेको ट्यांकरमा मंगलबार बिहान प्रक्षेप्य प्रहार भएको थियो। आक्रमणपछि जहाजमा आगलागी भए पनि कुनै वातावरणीय क्षति नभएको र घटनाबारे अनुसन्धान भइरहेको जनाइएको छ।
इरानी सरकारी सञ्चारमाध्यमले कतारबाट एलएनजी बोकेको ट्यांकर आक्रमणमा परेको उल्लेख गरे पनि तेहरानले घटनाको जिम्मेवारी स्वीकार गरेको छैन।
विश्वको करिब पाँचौं भाग तेल तथा प्राकृतिक ग्यास ओसारपसार हुने हर्मुज जलघाँटीमा पछिल्ला दिनमा बढेको तनावले अन्तर्राष्ट्रिय ऊर्जा आपूर्ति र समुद्री सुरक्षाप्रति थप चासो बढाएको छ।
यसअघि इरानको संयुक्त सैन्य कमान्डले जलघाँटी हुँदै आवतजावत गर्ने जहाजले स्वीकृत मार्ग प्रयोग गर्नुपर्ने चेतावनी दिँदै अमेरिकी सैन्य हस्तक्षेप भए कडा जवाफ दिने बताएको थियो।
उता, अमेरिका र इरानबीच हर्मुज जलघाँटी खुला राख्ने, इरानको आणविक कार्यक्रम र जारी द्वन्द्व अन्त्यका विषयमा वार्ता अघि बढाउने प्रयास जारी रहे पनि खामेनीको अन्त्येष्टिका कारण संवाद केही समयका लागि स्थगित भएको छ।
यसैबीच अमेरिकी राष्ट्रपति डोनाल्ड ट्रम्पले इरानलाई सम्झौता गर्न आग्रह गर्दै आवश्यक परे ऊर्जा पूर्वाधारमाथि पनि आक्रमण गर्न सकिने चेतावनी दिएका छन्।
खामेनीको अन्त्येष्टिका क्रममा इरानका विभिन्न सहरमा लाखौं नागरिक श्रद्धाञ्जलिका लागि भेला भएका छन्। नयाँ सर्वोच्च नेता अयातुल्ला मोज्तबा खामेनी भने सुरक्षा कारणले सार्वजनिक रूपमा अन्त्येष्टि कार्यक्रममा सहभागी भएका छैनन्।
प्रकाशित मिति: २३ असार २०८३, मंगलबार
प्रतिक्रिया