काठमाडौं । बाँकेको राप्ती नदीको कम्दी क्षेत्रमा पौडी खेल्ने क्रममा बेपत्ता भएका दुई बालबालिकामध्ये एक जनाको शव फेला परेको छ भने अर्की बालिकाको खोजी कार्य जारी रहेको छ।
जिल्ला प्रहरी कार्यालय बाँकेका अनुसार डुडुवा गाउँपालिका–५ का ९ वर्षीय शुलभ रावतको शव आइतबार फेला परेको हो। सोही स्थानकी ११ वर्षीया खुशी सिजापति अझै बेपत्ता रहेकी छन्।
नेपाली सेना, नेपाल प्रहरी र सशस्त्र प्रहरी बलको संयुक्त टोलीले नदी क्षेत्रमा उनको खोजी गरिरहेको प्रहरीले जनाएको छ।
शनिबार दिउँसो करिब ४ बजे घरबाट निस्किएका दुवै बालबालिका साँझसम्म घर नफर्केपछि परिवारले प्रहरीलाई जानकारी गराएका थिए। घटनाबारे स्थानीय भैँसी गोठालाले शनिबार राति परिवारलाई जानकारी दिएपछि खोजी अभियान सुरु गरिएको थियो।
प्रकाशित मिति: २८ असार २०८३, आइतबार
प्रतिक्रिया