काठमाडौं । विशेष अदालतले बाँके मालपोत कार्यालयका तत्कालीन मालपोत अधिकृतसहित चार जनालाई जग्गा हिनामिना तथा भ्रष्टाचार मुद्दामा दोषी ठहर गर्दै जनही ६ महिना कैद र २५ हजार रुपैयाँ जरिवानाको फैसला गरेको छ।
अदालतले मृतक सुर्ता कुर्मीको नाममा रहेको जग्गा गैरकानुनी रूपमा नामसारी गरिएको ठहर गर्दै तत्कालीन मालपोत अधिकृत ऋषिराम के.सी., नायब सुब्बा ताराप्रसाद खनाल, लिलावती कैराती र विरेन्द्र कुमार कुर्मीलाई दोषी ठहर गरेको हो। साथै, हिनामिना गरिएको उक्त जग्गा जफत गरी नेपाल सरकारको नाममा कायम गर्न आदेश दिएको छ।
यही मुद्दामा आरोपित अशोककुमार भट्टराई, कर्णबहादुर पुन र मानबहादुर बोगटी भने प्रमाण अभावमा सफाइ पाएका छन्। अदालतका अनुसार सर्वोच्च अदालतसम्मबाट दाबी खारेज भइसकेको जग्गा गलत कागजात तयार गरी नामसारी गरिएको पुष्टि भएपछि दोषीलाई सजाय सुनाइएको हो।
प्रकाशित मिति: ३० असार २०८३, मंगलबार
प्रतिक्रिया