काठमाडौं । रौतहटको दुर्गा भगवती गाउँपालिका–३ मा सामाजिक सुरक्षा भत्ता वितरणमा अनियमितता गरेको आरोपमा तत्कालीन निमित्त कार्यकारी अधिकृत, वडाध्यक्ष, वडा सचिवसहित ४२ जनाविरुद्ध विशेष अदालत काठमाडौंमा भ्रष्टाचार मुद्दा दायर गरिएको छ।
अख्तियारका अनुसार आर्थिक वर्ष २०७४/७५ देखि २०८१/८२ सम्म कानुनी योग्यता नपुगेका व्यक्तिलाई वृद्धभत्ता, एकल महिला/विधवा भत्ता वितरण गरिएको, झुट्टा विवरणका आधारमा परिचयपत्र जारी गरिएको तथा दोहोरो भुक्तानी गरिएको पाइएको छ।
यस प्रकरणमा करिब ३२ लाख २४ हजार रुपैयाँ बराबरको सार्वजनिक सम्पत्ति हिनामिना भएको आरोप लगाइएको छ। अनुसन्धानमा उमेर नपुगेकालाई वृद्धभत्ता र श्रीमान् जीवित रहेकी महिलालाई विधवा भत्ता उपलब्ध गराइएको समेत खुलेको छ। अख्तियारले भ्रष्टाचार निवारण ऐन, २०५९ अन्तर्गत सजायको माग गर्दै आरोपपत्र दायर गरेको छ।
प्रकाशित मिति: ४ श्रावण २०८३, सोमबार
प्रतिक्रिया