काठमाडौं। गोरखा जिल्लाको चुमनुब्री गाउँपालिका–४ प्रोक छाकगाउँकी २९ वर्षीया पेमा खाण्डो लामाको सुत्केरीपछिको स्वास्थ्य अवस्था गम्भीर बनेपछि हेलिकप्टरमार्फत उद्धार गरी काठमाडौं ल्याइएको छ।
गर्भावस्थाको २८औँ हप्तामै शिशु जन्मिएपछि स्वास्थ्यमा जटिलता देखिएकी लामालाई दुर्गम क्षेत्रमा विशेषज्ञ उपचार सम्भव नभएकाले राष्ट्रपति महिला उत्थान कार्यक्रमअन्तर्गत हवाई उद्धार गरिएको हो।
महिला, बालबालिका, लैङ्गिक तथा यौनिक अल्पसंख्यक र सामाजिक सुरक्षा मन्त्रालयको समन्वयमा उद्धार गरिएकी लामालाई थप उपचारका लागि काठमाडौंस्थित परोपकार प्रसूति तथा स्त्रीरोग अस्पताल, थापाथलीमा भर्ना गरिएको मन्त्रालयले जनाएको छ।
मन्त्रालयले दुर्गम क्षेत्रमा जोखिममा परेका गर्भवती तथा सुत्केरी महिलाको जीवनरक्षा र सुरक्षित मातृत्व सुनिश्चित गर्न राष्ट्रपति महिला उत्थान कार्यक्रममार्फत निःशुल्क हवाई उद्धार सेवा सञ्चालन गर्दै आएको जनाएको छ।
प्रकाशित मिति: ८ श्रावण २०८३, शुक्रबार
प्रतिक्रिया