काठमाडौ । नागढुङ्गा सुरुङमार्ग प्रयोग गरेबापत सवारी साधनहरूले तिर्नुपर्ने सडक उपभोग दस्तुर सार्वजनिक भएको छ।
सोमबारदेखि सञ्चालनमा आएको सुरुङ मार्ग प्रयोग गर्दा सवारी साधनहरूलाई चार वर्गमा विभाजन गरी काठमाडौँतर्फ र धादिङतर्फ यात्रा गर्ने सवारीका लागि फरकफरक दर निर्धारण गरिएको छ।
कार, भ्यान, पिकअप, ट्र्याक्टर, माइक्रो बस र अन्य हलुका सवारी साधनले काठमाडौँ आउँदा ६५ रुपैयाँ र धादिङ जाँदा ६० रुपैयाँ दस्तुर बुझाउनुपर्नेछ।
मिनी बस र मिनी ट्रिपररट्रकका लागि काठमाडौँतर्फ आउँदा ११५ रुपैयाँ र धादिङतर्फ जाँदा ८० रुपैयाँ दर तय गरिएको छ।
त्यस्तै बस तथा सिङ्गल रियर एक्सल भएका ट्रकका लागि काठमाडौँ आउँदा २६० रुपैयाँ र धादिङ जाँदा दुई सय रुपैयाँ शुल्क निर्धारण गरिएको छ।
मल्टी एक्सल ट्रक, ठूला सवारी साधन तथा उपकरणहरूले काठमाडौँ छिर्दा ६०० रुपैयाँ र धादिङतर्फ जाँदा २५० रुपैयाँ दस्तुर बुझाउनुपर्ने आयोजनाले जनाएको छ।
टोल दर सवारी सञ्चालन खर्च र यात्रा समयको बचतबाट प्राप्त हुने अनुमानित बचतलाई आधार मानेर तय गरिएको हो।
जसअनुसार काठमाडौँतर्फ जाने सवारीका लागि बचतको करिब ३० प्रतिशत र धादिङतर्फ जाने सवारीका लागि बचतको करिब ३६ प्रतिशत हुने गरी दस्तुर निर्धारण गरिएको छ।
प्रकाशित मिति: १२ श्रावण २०८३, मंगलबार
प्रतिक्रिया