काठमाडौं । स्याङ्जाको गल्याङ नगरपालिका–८ करादीस्थित भित्री सडकखण्डमा बोलेरो जिप दुर्घटना हुँदा दुई जनाको घटनास्थलमै मृत्यु भएको छ। दुर्घटनामा चालकसहित १० जना घाइते भएका छन्।
सोमबार साँझ करिब ५ः४५ बजे गल्याङबाट गल्याङ नगरपालिका–९ साङ्लियातर्फ जाँदै गरेको ग १ ज ६५३४ नम्बरको बोलेरो जिप उकालो घुम्तीमा चालकले नियन्त्रण गुमाउँदा दुर्घटनामा परेको प्रहरीले जनाएको छ।
दुर्घटनाको खबर पाएलगत्तै प्रहरी टोली घटनास्थलमा पुगेर उद्धार गरेको थियो। घाइतेहरूलाई उपचारका लागि अस्पताल पठाइएको छ।
जिपमा कति जना सवार थिए भन्ने यकिन हुन बाँकी रहेको प्रहरीले जनाएको छ। मृतक तथा घाइतेको पहिचानसमेत खुल्न सकेको छैन। दुर्घटनाबारे थप अनुसन्धान भइरहेको प्रहरीले जनाएको छ।
प्रकाशित मिति: ८ भाद्र २०८३, सोमबार
प्रतिक्रिया