काठमाडौं । प्रधानमन्त्री वालेन्द्र शाहले मानव बेचबिखन तथा ओसारपसारमुक्त समाज निर्माणका लागि संघ, प्रदेश र स्थानीय तहसहित सबै सरोकारवालाबीच प्रभावकारी सहकार्य र समन्वय आवश्यक रहेको बताएका छन्।
मानव बेचबिखनविरुद्धको २०औँ राष्ट्रिय दिवसका अवसरमा शुभकामना सन्देश जारी गर्दै प्रधानमन्त्री शाहले मानव बेचबिखन मानव सभ्यताकै कलंक भएको र यो संगठित अपराधका रूपमा विश्वभर फैलिरहेको बताएका हुन्।
‘प्रविधिको सही प्रयोग र सजगताः मानव बेचबिखनरहित राष्ट्र निर्माणमा ऐक्यबद्धता’ भन्ने नाराका साथ दिवस मनाइँदैछ। प्रधानमन्त्री शाहले प्रविधिको तीव्र विकाससँगै मानव बेचबिखन तथा ओसारपसारको प्रवृत्ति, प्रकृति, स्वरूप र गन्तव्यसमेत परिवर्तन हुँदै गएको उल्लेख गरेका छन्।
उनका अनुसार मानव बेचबिखन तथा ओसारपसारको रोकथाम र नियन्त्रणका लागि नेपाल सरकारले राष्ट्रिय तथा अन्तर्राष्ट्रिय प्रतिबद्धताअनुरूप नीतिगत र संस्थागत सुधार गर्दै आएको छ। यसका लागि तीनै तहका सरकार तथा सम्बन्धित सरोकारवालाको समन्वयमा विभिन्न पहल भइरहेको उनले बताएका छन्।
प्रधानमन्त्री शाहले मानव बेचबिखन तथा ओसारपसार (नियन्त्रण) ऐन, २०६४ लाई पालेर्मो प्रोटोकलअनुकूल बनाउने गरी संशोधन विधेयक संसद्मा दर्ता गरिएको जानकारी दिएका छन्। प्रस्तावित संशोधनले मानव बेचबिखन तथा ओसारपसारका पीडितको मानव अधिकार संरक्षणका लागि अन्तर्राष्ट्रियस्तरमा राज्यहरूबीच सहयोग र समन्वय बढाउन सहज हुने सरकारको अपेक्षा छ।
संघीय संरचनाअनुकूल विद्यमान कानुनी तथा संस्थागत संयन्त्रलाई परिमार्जन गर्ने क्रममा मानव बेचबिखनविरुद्धको नीति जारी गरी कार्यान्वयनमा ल्याइएको पनि प्रधानमन्त्री शाहले बताएका छन्।
उनले मानव बेचबिखनविरुद्धको अभियानमा संघीय सरकारसँगै प्रदेश सरकार, स्थानीय तह, राष्ट्रिय तथा अन्तर्राष्ट्रिय गैरसरकारी संस्था, विकास साझेदार र अन्य सरोकारवालाको सहकार्य अपरिहार्य रहेको बताए।
‘हाम्रो साझा पहल र संयुक्त प्रयासले मात्र मानव बेचबिखनमुक्त समाज बनाउन सम्भव हुनेछ,’ प्रधानमन्त्री शाहले सन्देशमा भनेका छन्।
प्रधानमन्त्री शाहले मानव बेचबिखन तथा ओसारपसारविरुद्ध सरकारको अभियानमा निरन्तर सहयोग, समन्वय र सहकार्य गर्ने सबैप्रति धन्यवाद व्यक्त गर्दै सरकारको अभियानमा साथ, सहयोग र ऐक्यबद्धताका लागि आग्रह गरेका छन्।
प्रकाशित मिति: २० भाद्र २०८३, शनिबार
प्रतिक्रिया