काठमाडौं । भारतको छत्तीसगढस्थित झीरम घाटीमा सन् २०१३ मा भएको घातक माओवादी आक्रमणमा दोषी ठहर भएका १० जनालाई विशेष अदालतले मृत्युदण्डको फैसला सुनाएको छ ।
छत्तीसगढको जगदलपुरस्थित राष्ट्रिय अनुसन्धान एजेन्सी (एनआईए) को विशेष अदालतले बुधबार १० जना माओवादी कार्यकर्तालाई मृत्युदण्डको सजाय सुनाएको हो । उनीहरूलाई आक्रमण तथा हत्या र राज्यविरुद्ध युद्ध भड्काउनेलगायत विभिन्न अपराधमा दोषी ठहर गरिएको थियो ।
सन् २०१३ मे २५ मा छत्तीसगढको बस्तरस्थित झीरम घाटीमा भारतीय राष्ट्रिय कांग्रेसले आयोजना गरेको ‘परिवर्तन यात्रा’माथि माओवादीले आक्रमण गरेको थियो । माओवादीले कांग्रेस नेता तथा कार्यकर्ता सवार समूहलाई लक्षित गरी आक्रमण गर्दा २७ जनाको मृत्यु भएको थियो भने ३८ जना घाइते भएका थिए । मृतकमध्ये १० जना सुरक्षाकर्मी थिए ।
एनआईएका अनुसार माओवादीले सडकमा कांग्रेसको टोलीलाई रोकेर विस्फोट तथा गोली प्रहार गरेका थिए । आक्रमणका क्रममा सुरक्षाकर्मीका हतियारसमेत लुटिएका थिए । घटनामा वरिष्ठ कांग्रेस नेता तथा छत्तीसगढका तत्कालीन प्रदेशस्तरीय नेताहरूको समेत मृत्यु भएको थियो ।
एनआईएले अनुसन्धानका क्रममा १० जना माओवादी कार्यकर्ता आक्रमण तथा हत्या गर्ने आपराधिक षड्यन्त्रमा संलग्न रहेको निष्कर्ष निकालेको थियो । मुद्दामा विभिन्न चरणमा आरोपपत्र दायर गरिएको थियो र पछिल्लो फैसलासँगै १० जनालाई मृत्युदण्ड सुनाइएको हो ।
भारतमा सन् १९६० को दशकदेखि विभिन्न क्षेत्रमा माओवादी सशस्त्र विद्रोह हुँदै आएको थियो । विद्रोहका क्रममा हजारौँ मानिसको मृत्यु भएको छ । सरकारले पछिल्ला वर्षहरूमा माओवादी प्रभावित क्षेत्रमा सुरक्षा कारबाही तीव्र बनाएपछि विद्रोही गतिविधि उल्लेख्य रूपमा कमजोर भएको जनाएको छ ।
झीरम घाटी प्रकरणको फैसला भने १३ वर्षभन्दा बढी समयपछि आएको हो । अदालतको मृत्युदण्डसम्बन्धी फैसला उच्च अदालतमा पुनरवलोकन तथा अपिलको प्रक्रियाबाट समेत गुज्रिनेछ ।
प्रकाशित मिति: १ आश्विन २०८३, बिहिबार
प्रतिक्रिया