काठमाडौं । नेपाली कम्युनिस्ट पार्टी (नेकपा) का संयोजक पुष्पकमल दाहाल ‘प्रचण्ड’ले भारतबाट मुर्रा जातका भैंसी ल्याउने निर्णय किसानको जीवनस्तर सुधारसँग जोडिएको बताएका छन् ।
शुक्रबार नेकपानिकट अखिल नेपाल किसान महासंघको भेलालाई सम्बोधन गर्दै प्रचण्डले आफू प्रधानमन्त्री रहेका बेला भारतबाट मुर्रा जातका राँगा ल्याउने निर्णयलाई विरोधीहरूले उपहासको विषय बनाएको बताए ।
उनले मुर्रा जातका भैंसीको प्रजननमार्फत कृषि तथा पशुपालन क्षेत्रमा सुधार ल्याउने उद्देश्य रहेको दाबी गरे ।
‘मुर्रा भैंसी ल्याउने कुरा चानचुने थिएन । दशौँ वर्षदेखि अरूले नसकेको कुरा थियो त्यो । त्यो मुर्रा भैंसी ल्याउने कुरा किसानको जीवनमा परिवर्तन ल्याउने कुरासँग नै सम्बन्धित थियो,’ उनले भने ।
भारत सरकारले २०८० मंसिरमा नेपाललाई उच्च प्रजनन क्षमता भएका १५ वटा मुर्रा राँगा उपलब्ध गराएको थियो ।
प्रचण्डले आफ्नो नेतृत्वको पछिल्लो सरकारका पालामा कृषि क्षेत्रमा लगानी बढाउने र किसानलाई उत्पादनतर्फ प्रोत्साहित गर्ने गरी बजेट तथा कार्यक्रम अघि बढाइएको पनि बताए ।
‘हामीले विगतमा धेरै गर्न नसकेको भए पनि पछिल्लो सरकारमा हुँदाको बजेट हेर्नुभयो भने कृषि क्षेत्रमा कसरी लगानी बढाउने र किसानहरूलाई कसरी उत्प्रेरित गर्ने भन्नेमा थियो,’ उनले भने ।
प्रकाशित मिति: २ आश्विन २०८३, शुक्रबार
प्रतिक्रिया