दिल्लीबाट बिहार जाँदै गरेको बसमा भीषण आगलागी, ९ जनाको मृत्यु

काठमाडौं । भारतको ग्रेटर नोएडामा दिल्लीबाट बिहारतर्फ जाँदै गरेको स्लिपर बसमा आगलागी हुँदा नौ यात्रुको मृत्यु भएको छ।

प्रहरीका अनुसार यमुना एक्सप्रेस वेअन्तर्गत जेवर प्रहरी चौकी क्षेत्रको ३३ किलोमिटर माइलस्टोन नजिकै रातिको समयमा बसमा आगलागी भएको हो।

आगलागीमा एक महिलासहित नौ जनाको मृत्यु भएको प्रहरीले जनाएको छ। आगलागीपछि बसभित्र धुवाँ भरिँदा यात्रुहरूलाई बाहिर निस्कन कठिन भएको थियो।

घटनामा बाँचेकी यात्रु रिंकी राजपूतले भारतीय समाचार संस्था एएनआईसँग आफू आगलागीका बेला बसभित्र सुतिरहेको बताएकी छन्।

उनका अनुसार कसैले ठूलो आवाजमा बसको ढोका ढकढकाएपछि उनको निद्रा खुलेको थियो। आँखा खोल्दा बसभित्र ठूलो भीड र अस्तव्यस्त अवस्था देखिएको उनले बताइन्।

‘म सुतिरहेको थिएँ। कसैले ठूलो स्वरमा ढोका ढकढकायो। जब मैले आँखा खोलें, त्यहाँ पहिले नै ठूलो भिड थियो,’ उनले भनिन्।

उनका अनुसार त्यसपछि यात्रुहरू ज्यान जोगाउन एकअर्कालाई धकेल्दै बाहिर निस्कने प्रयास गरिरहेका थिए। सोही क्रममा आफू पनि धकेलिँदै बाहिर निस्कन सफल भएको उनले बताइन्।

‘मानिसहरू एकअर्कालाई धकेलिरहेका थिए। मलाई पनि धकेलियो र अन्ततः कसैले मलाई बाहिर निकाल्यो। त्यसपछि मलाई केही याद छैन,’ उनले भनिन्।

बस पूर्ण रूपमा धुवाँले भरिएको र बाहिर निस्कन निकै कठिन भएको राजपूतले बताइन्। अत्यधिक धुवाँका कारण बसभित्र केही देख्न नसकिने अवस्था रहेको उनको भनाइ थियो।

‘बस पूर्ण रूपमा धुवाँले भरिएको थियो। त्यहाँ अस्तव्यस्तता थियो र बाहिर निस्कन धेरै गाह्रो थियो। यति धेरै धुवाँ थियो कि केही पनि देखिँदैनथ्यो,’ उनले भनिन्।

उनका अनुसार बसभित्र रहेका यात्रुहरू धुवाँका कारण निसास्सिन थालेका थिए। धेरै कम यात्रु मात्रै बाहिर निस्कन सफल भएको उनले बताइन्।

‘धेरै कम मानिसहरू बाहिर निस्कन सफल भए। तीमध्ये पनि धकेलाधकेलकै बीचमा कुनै न कुनै रूपमा बाटो बनाउन सक्नेहरू मात्र बाहिर आउन सके,’ उनले भनिन्।

राजपूतले आफूभन्दा पछाडि धेरै यात्रु रहेको र उनीहरू बाहिर निस्कन नसकेको हुन सक्ने बताइन्।

‘धेरै मानिसहरूले आफ्नो ज्यान गुमाए। मेरो पछाडि धेरै मानिसहरू थिए, जो सायद बाहिर निस्कन सकेनन्। म आफैं पनि धेरै समयपछि मात्र बाहिर निस्कन सकें,’ उनले भनिन्।

घटनाबारे भारतीय प्रहरीले थप अनुसन्धान गरिरहेको जनाएको छ।

प्रकाशित मिति: ८ आश्विन २०८३, बिहिबार