काठमाडौं । राष्ट्रिय मानव अधिकार आयोगले उपत्यका अपराध अनुसन्धान कार्यालय, टेकुका प्रमुख प्रहरी वरिष्ठ उपरीक्षक (एसएसपी) सन्तोष खड्कालाई बयानका लागि बोलाएको छ।
पूर्वप्रधानन्यायाधीश चोलेन्द्रशमशेर जबरा हिरासतमा रहेका बेला आयोगको टोलीलाई भेट्न नदिएको विषयमा आयोगले खड्कालाई सोमबार पत्राचार गर्दै बयानका लागि बोलाएको हो।
आयोगका अनुसार खड्कालाई असोज १३ गते मंगलबार आयोगमा उपस्थित हुन भनिएको छ। आयोगको टोलीलाई हिरासत अनुगमन गर्न रोक लगाइएको विषयमा खड्कासँग सोधपुछ गर्न लागिएको हो।
आइतबार आयोगका सदस्य मनोज दुवाडीसहित तीन सदस्यीय टोली जबरालाई भेट्न उपत्यका अपराध अनुसन्धान कार्यालय, टेकु पुगेको थियो। तर प्रहरीले आयोगको टोलीलाई जबरासँग भेट गर्न नदिएपछि टोली फर्किएको थियो।
यसअघि आइतबार बिहान उपत्यका अपराध अनुसन्धान कार्यालयको टोलीले ‘सुरक्षा थ्रेट’ रहेको भन्दै जबरालाई महाराजगञ्जस्थित निवासबाट नियन्त्रणमा लिएको थियो।
जबरालाई हिरासतमा राखिएको विषय तथा आयोगको टोलीलाई भेट्न नदिएको घटनाबारे आयोगले चासो राख्दै एसएसपी खड्कालाई बयानका लागि बोलाएको हो।
प्रकाशित मिति: १२ आश्विन २०८३, सोमबार
प्रतिक्रिया