काठमाडौं । प्रधानमन्त्री बालेन्द्र शाहले प्रतिनिधिसभामा रहेका प्राविधिक पृष्ठभूमिका सांसदहरूलाई दलीय राजनीतिमा मात्र सीमित नभई आफ्नो विज्ञता मुलुकको दीर्घकालीन विकास र नीति निर्माणमा उपयोग गर्न आग्रह गरेका छन्।
बुधबार सिंहदरबारस्थित प्रधानमन्त्री तथा मन्त्रिपरिषद्को कार्यालयमा प्राविधिक पृष्ठभूमिका सांसदहरूसँग भएको छलफलमा प्रधानमन्त्री शाहले परम्परागत राजनीतिक विषयभन्दा माथि उठेर दीर्घकालीन नीति निर्माण र नवीन सोचमा केन्द्रित हुन आग्रह गरेका हुन्।
छलफलमा उनले सांसदहरूलाई आफ्नो ज्ञान, सीप र अनुभवलाई देश विकासका योजना तथा नीतिमा रूपान्तरण गर्न सुझाव दिए।
‘तपाईंहरू आफैं प्राविधिक विषयमा जानकार हुनुहुन्छ र मुलुकको नीति निर्माण गर्ने थलोमै पुग्नुभएको छ। त्यसैले देश विकासका लागि आफ्नो ज्ञान, सीप र अनुभवको अधिकतम उपयोग गर्नुहोस्,’ प्रधानमन्त्री शाहले भने।
प्रधानमन्त्री शाहले सांसदहरूले दलीय राजनीतिक जिम्मेवारीसँगै आफ्नो प्राविधिक दक्षता र व्यावसायिक पहिचानलाई पनि प्राथमिकता दिनुपर्ने बताए।
निर्वाचन तथा राजनीतिक गतिविधिका समयमा पार्टी राजनीतिमा सक्रिय हुनु स्वाभाविक भए पनि अन्य समयमा सांसदहरूले आफ्नो विशेषज्ञता मुलुकको विकास र नीति निर्माणमा प्रयोग गर्नुपर्ने उनको भनाइ थियो।
प्राविधिक जनशक्तिको ज्ञान र अनुभवलाई राज्यको नीति निर्माण तथा विकास प्रक्रियासँग जोड्न सके दीर्घकालीन रूपमा मुलुकलाई लाभ पुग्ने प्रधानमन्त्री शाहले बताएका थिए।
प्रकाशित मिति: १४ आश्विन २०८३, बुधबार
प्रतिक्रिया