काठमाडौं । प्रतिनिधि सभाले तीन वटा विधेयकलाई दफावार छलफलका लागि सम्बन्धित समितिमा पठाएको छ।
बिहीबार बसेको प्रतिनिधि सभा बैठकमा अर्थमन्त्री डा. स्वर्णिम वाग्लेले ‘कर्मचारी सञ्चय कोष (दशौँ संशोधन) विधेयक, २०८३’, ‘नागरिक लगानी कोष (तेस्रो संशोधन) विधेयक, २०८३’ र ‘भुक्तानी तथा फर्स्योट (पहिलो संशोधन) विधेयक, २०८३’ लाई दफावार छलफलका लागि सम्बन्धित समितिमा पठाइयोस् भन्ने प्रस्ताव प्रस्तुत गरेका थिए।
मन्त्री वाग्लेले प्रस्तुत गरेको प्रस्तावलाई बैठकले सर्वसम्मतिले स्वीकृत गरेको हो। प्रस्ताव स्वीकृत भएसँगै तीनवटै विधेयक सम्बन्धित समितिमा दफावार छलफलका लागि पठाइएको छ।
यसअघि बैठकमा प्रधानमन्त्री बालेन्द्र शाहका तर्फबाट कानुन, न्याय तथा संसदीय मामिलामन्त्री सोबिता गौतमले ‘राष्ट्रिय प्राकृतिक स्रोत तथा वित्त आयोगको आठौँ वार्षिक प्रतिवेदन, २०८३’ सभासमक्ष पेस गरेकी थिइन्।
त्यसैगरी, राज्य व्यवस्था तथा सुशासन समितिका सभापति हरि ढकालले ‘संवैधानिक निकायका पदाधिकारीहरूको पारिश्रमिक, सेवाको शर्त र सुविधासम्बन्धी (पहिलो संशोधन) विधेयकसम्बन्धी समितिको प्रतिवेदन, २०८३’ प्रतिनिधि सभामा पेस गरेका थिए।
प्रतिवेदन पेस भएपछि सभामुख डोलप्रसाद अर्यालले प्रतिनिधि सभाको अर्को बैठक शुक्रबार बिहान ११ बजे बस्ने गरी स्थगित भएको घोषणा गरे।
प्रकाशित मिति: १५ आश्विन २०८३, बिहिबार
प्रतिक्रिया