धनगढी । नेपाली कांग्रेसको समानान्तर महाधिवेशनको तयारी गरिरहेको निवर्तमान सभापति शेरबहादुर देउवा समूहले डा. आरजु राणा देउवालाई कैलालीको धनगढीबाट क्षेत्रीय प्रतिनिधि चयन गरेको छ।
धनगढी उपमहानगरपालिका–४ को वडा अधिवेशनबाट आरजु सर्वसम्मत रूपमा क्षेत्रीय प्रतिनिधि चयन भएकी हुन्। लामो समयदेखि विदेशमा रहेकी आरजुको प्रतिनिधित्व भने वारेसनामामार्फत गरिएको जनाइएको छ।
कांग्रेस नेता तथा धनगढी उपमहानगरपालिका–३ का वडाध्यक्ष बुद्धि खड्काका अनुसार वडा अधिवेशनबाट आरजुसहित ५१ जना क्षेत्रीय प्रतिनिधि र १८ सदस्यीय वडा समिति चयन गरिएको छ।
कांग्रेसको संस्थापन पक्षले अघि बढाएको महाधिवेशन प्रक्रियाभन्दा अलग्गै देउवा समूहले समानान्तर रूपमा आफ्नो अधिवेशन प्रक्रिया अघि बढाइरहेको छ। देउवा समूहले असोज १५ गतेदेखि वडा अधिवेशन सुरु गरेको हो।
यसैबीच, निवर्तमान सभापति देउवा पनि आफ्नो गृहजिल्ला डडेल्धुराको गन्यापधुरा गाउँपालिका–१ बाट सर्वसम्मत क्षेत्रीय प्रतिनिधि चयन भएका छन्। काठमाडौंमै रहेका देउवाले वारेसनामामार्फत उम्मेदवारी दर्ता गराएका थिए।
प्रकाशित मिति: १७ आश्विन २०८३, शनिबार
प्रतिक्रिया