मुगु । मुगुको छायाँनाथ रारा नगरपालिका–१२ स्थित सुनाता खोला नजिकै पहिरो खस्दा बोलेरो जिप पुरिएको छ। जिपमा कोही सवार नरहेकाले मानवीय क्षति हुनबाट जोगिएको छ।
बिहीबार बिहान करिब १०ः३० बजे गमगढीबाट सुनातातर्फ गएर फर्किने क्रममा लु.प्र.००१०१ च १२११ नम्बरको जिप पहिरोमा परेको हो। जिप विशाल खत्रीले चलाएका थिए।
घटनाको जानकारी पाएपछि अस्थायी प्रहरी पोस्ट रोवाबाट प्रहरी सहायक निरीक्षक प्रकाशबहादुर सिंहको नेतृत्वमा प्रहरी टोली घटनास्थल पुगेको थियो। प्रहरी टोली दिउँसो १ः२० बजे घटनास्थल पुगेको प्रहरीले जनाएको छ।
पहिरोमा पुरिएको जिप निकाल्ने प्रयास भइरहेको छ। घटनाबारे थप विवरण आउन बाँकी रहेको प्रहरीले जनाएको छ।
प्रकाशित मिति: २१ आश्विन २०८३, बुधबार
प्रतिक्रिया