काठमाडौं । नेकपा (एमाले) का नेता महेश बस्नेतले बढ्दो महँगी र ग्यास अभावका कारण सर्वसाधारणको दैनिक जनजीवन प्रभावित भएको बताएका छन्। खाद्यवस्तुको मूल्य २०० प्रतिशतभन्दा बढीले वृद्धि भएको दाबी गर्दै उनले सरकारको कार्यशैलीप्रति असन्तुष्टि जनाएका छन्।
नेकपा एमाले बागमती प्रदेश कमिटीले आयोजना गरेको कार्यक्रममा बोल्दै बस्नेतले दसैँ, तिहार र छठजस्ता प्रमुख चाडपर्व नजिकिँदै गर्दा महँगीले नागरिकमाथि थप आर्थिक भार पारेको बताए। उनका अनुसार गत वर्ष सहज रूपमा चाडपर्व मनाएका सर्वसाधारणले यस वर्ष बढ्दो मूल्यवृद्धिका कारण पर्व मनाउनसमेत कठिनाइ भोग्नुपर्ने अवस्था आएको छ।
उनले खाना पकाउने ग्यासको अभावसमेत कायमै रहेको उल्लेख गर्दै उपभोक्ता ग्यासका लागि लामो समय लाइनमा बस्नुपर्ने बाध्यताबाट मुक्त हुन नसकेको बताए।
‘जनताले विकास, समृद्धि र सुखका कुराहरू बिर्सिसकेका छन्। आज जनता यति धेरै आतङ्कित छन् कि अब आतङ्कमुक्त वातावरण र शान्ति–सुरक्षा चाहियो भनिरहेका छन्,’ बस्नेतले भने।
चाडपर्वको समयमा महँगीले सर्वसाधारणको आर्थिक अवस्था थप कमजोर बनाएको उल्लेख गर्दै उनले अघिल्लो वर्षको तुलनामा यस वर्ष चाडपर्व मनाउने सहज वातावरण नरहेको बताए।
बस्नेतले सरकारको कार्यशैलीका कारण नागरिकमा असुरक्षाको अनुभूति बढेको दाबी गर्दै शान्ति–सुरक्षा, विकास र समृद्धिका विषय ओझेलमा परेको टिप्पणी गरे।
उनले खाद्यवस्तुको मूल्यवृद्धि र ग्यास अभावजस्ता समस्याले सर्वसाधारणलाई प्रत्यक्ष असर पारिरहेको भन्दै सरकारको कामकारबाहीप्रति आलोचना गरेका हुन्।
प्रकाशित मिति: २४ आश्विन २०८३, शनिबार
प्रतिक्रिया