काठमाडौं । नेपाल–भारत सीमावर्ती क्षेत्रसम्मको पहुँच सहज बनाउने उद्देश्यले भारत सरकारले दुई ठूला फोरलेन सडक परियोजना अघि बढाएको छ। मुजफ्फरपुर–सोनबरसा र खगडिया–पूर्णिया सडक निर्माण भएपछि सीमावर्ती क्षेत्रको यातायात, व्यापार र मालसामान ढुवानी सहज हुने अपेक्षा गरिएको छ।
कुल २२६ किलोमिटर लम्बाइका यी दुई सडक परियोजना सार्वजनिक–निजी साझेदारी (पीपीपी) मोडलमा निर्माण गर्ने योजना छ। समाचारअनुसार दुवै परियोजनाको ठेक्का प्रक्रिया अघि बढिरहेको छ।
मुजफ्फरपुर–सोनबरसा सडकमा ३५९१ करोड भारु लागत
८३ किलोमिटर लामो मुजफ्फरपुर–सोनबरसा फोरलेन सडक निर्माणका लागि ३ हजार ५९१ करोड भारतीय रुपैयाँ लागत अनुमान गरिएको छ। यो सडक बनेपछि मुजफ्फरपुर, सीतामढी हुँदै नेपालको सोनबरसा सीमा क्षेत्रमा पुग्न सहज हुने बताइएको छ।
परियोजनाअन्तर्गत ३४० मिटर लामो एउटा ठूलो पुल, पाँचवटा साना पुल र तीनवटा रेलमार्गमाथिका पुल निर्माण गर्ने योजना छ। यसबाट सीमावर्ती क्षेत्रका बासिन्दालाई बजारसम्म आवतजावत गर्न र कृषि उपज ढुवानी गर्न सहज हुने अपेक्षा गरिएको छ।
खगडिया–पूर्णिया सडकमा ३९३६ करोड भारु लगानी
१४४ किलोमिटर लामो खगडिया–पूर्णिया फोरलेन सडकको लागत ३ हजार ९३६ करोड भारतीय रुपैयाँ अनुमान गरिएको छ। सडक निर्माणपछि खगडिया, भागलपुर, कटिहार र पूर्णिया क्षेत्रको यातायात तथा ढुवानी सहज हुने अपेक्षा छ।
परियोजनामा पूर्णियामा ६.७ किलोमिटर लामो नयाँ बाइपास र ढुवानी व्यवस्थापन केन्द्र निर्माण गर्ने योजना पनि छ। यसले सहरभित्रको सवारी चाप घटाउन तथा नेपाल र पश्चिम बंगालतर्फ हुने मालसामान ढुवानीलाई सहज बनाउन सहयोग पुग्ने बताइएको छ। मकै र जुटजस्ता कृषि उपजले बजारसम्म पहुँच पाउने अपेक्षा पनि गरिएको छ।
रामजानकी मार्गसँग जोड्ने योजना
यी सडकलाई ऐतिहासिक रामजानकी मार्गसँग जोड्ने योजना रहेको समाचारमा उल्लेख छ। यसबाट अयोध्या र जनकपुरधामबीचको धार्मिक पर्यटन तथा सीमापार आवागमन सहज हुने अपेक्षा गरिएको छ।
भारत–नेपाल सम्बन्ध र सीमावर्ती क्षेत्रको सहकार्यलाई बलियो बनाउने सम्भावनासहित अघि बढाइएका यी परियोजनालाई ‘मिडिया फर बोर्डर हार्मोनी’ ले स्वागत गरेको छ। संस्थाका भारततर्फका अध्यक्ष अमरेन्द्र तिवारीले सडकले दुई देशबीचको सम्बन्ध थप सुदृढ बनाउन योगदान पुर्याउने बताएका छन्।
प्रकाशित मिति: २६ आश्विन २०८३, सोमबार
प्रतिक्रिया