काठमाडौं । अमेरिकी राष्ट्रपति डोनाल्ड ट्रम्पले इरानसँग सम्झौता गर्न अमेरिकालाई कुनै हतार नभएको बताएका छन्। आगामी साता दुई देशबीच पुनः युद्ध सुरु हुन सक्ने वा नसक्नेबारे भने उनले स्पष्ट जवाफ दिन अस्वीकार गरेका छन्।
शनिबार फ्लोरिडाको पाम बिचस्थित आफ्नो मार–ए–लागो क्लबमा पत्रकारहरूसँग कुरा गर्दै ट्रम्पले यस्तो बताएका हुन्।
उनले अमेरिकी आक्रमणबाट इरानको नौसेना, वायुसेना र हवाई रक्षा प्रणालीमा ठूलो क्षति पुगेको दाबी गरे। इरानका प्रमुख सैन्य उपकरण र अधिकांश उत्पादन एकाइ ध्वस्त पारिएको तथा परमाणु केन्द्रहरूलाई समेत निशाना बनाइएको उनको भनाइ थियो।
‘हामीलाई सम्झौता गर्ने कुनै खास हतार छैन, किनकि हामीले उनीहरूको नौसेना र वायुसेना समाप्त गरिदिएका छौँ। अहिले एक वा दुईवटा ठेगानासँग मात्र जुध्न बाँकी छ र हामी यो काम १० मिनेटमै गर्न सक्छौँ,’ ट्रम्पले भने।
अमेरिकाले आगामी साता इरानमाथि फेरि आक्रमण गर्न सक्छ कि सक्दैन भन्ने पत्रकारको प्रश्नमा उनले सीधा जवाफ दिएनन्। ‘यदि म त्यसो गर्न गइरहेको छु भने के तपाईंलाई बताउँछु? र यदि त्यसो गर्न गइरहेको छैन भने के त्यो कुरा भन्छु? म केही पनि भन्न सक्दिनँ,’ उनले भने।
ट्रम्पले इरान सम्झौता गर्न इच्छुक रहेको दाबी गरे पनि उसको विश्वास गर्न नसकिने टिप्पणी गरे। इरानले यसअघि सम्झौता गरेर पछि त्यसबाट पछि हट्ने गरेको उनको आरोप थियो।
इरानी सर्वोच्च नेताको जवाफी कारबाहीको निर्देशन
इरानका सर्वोच्च नेता मोजतबा खामेनीले सशस्त्र सेनालाई कुनै पनि खतराको तत्काल जवाफ दिन निर्देशन दिएको केही घण्टापछि ट्रम्पको यस्तो अभिव्यक्ति आएको हो। खामेनीले अमेरिकी र इजरायली ठेगानालाई पनि आक्रमणको दायरामा राख्न निर्देशन दिएका छन्।
फेब्रुअरीमा अमेरिका र इजरायलले गरेको आक्रमणबाट सुरु भएको युद्धमा मोजतबाका पिता तथा तत्कालीन सर्वोच्च नेता आयातुल्ला अली खामेनीको मृत्यु भएको थियो। अहिले मध्यस्थकर्ताहरूले युद्ध पुनः सुरु हुन नदिन कूटनीतिक प्रयास गरिरहेका छन्।
यसैबीच, ट्रम्पले ब्राजिलका सिनेटर फ्लाभियो बोल्सोनारोको समर्थन गरेका छन्। राष्ट्रपति चुनावमा पराजित भएपछि अमेरिका आएका बोल्सोनारो आफूले चाहेसम्म अमेरिकामा बस्न सक्ने ट्रम्पले बताएका छन्। उनले ब्राजिलको चुनावलाई ‘लज्जास्पद’ भन्दै बोल्सोनारोमाथि अनुचित व्यवहार भएको आरोपसमेत लगाए।
ट्रम्पले आफ्नी पूर्ववकिल अलिना हब्बा मिल्डनसँग जोडिएको ५ करोड डलरभन्दा बढीको अनुबन्धबारे पनि असन्तुष्टि जनाएका छन्। भेनेजुएलाका एक बैंकरको परिवारसँग जोडिएको उक्त अनुबन्धबारे आफूले हब्बालाई भुक्तानी नलिन स्पष्ट पारेको ट्रम्पको भनाइ थियो। ती बैंकरलाई पछि ट्रम्पले माफी दिएका थिए।
प्रकाशित मिति: १५ कार्तिक २०८३, आइतबार
प्रतिक्रिया