काठमाडौं । उपभोक्ताले स्वच्छ, स्वस्थ र गुणस्तरीय मासु उपभोग गर्न पाऊन् भन्ने उद्देश्यले सरकारले पशु बधशाला तथा मासु जाँच ऐन कार्यान्वयनमा ल्याएको छ । कृषि, वन तथा पर्यावरण मन्त्रालयले काठमाडौं उपत्यकाका तीनवटै जिल्लामा मासु परीक्षण गरी स्वस्थ मासुमा छाप लगाउने अभियान सुरु गरेको हो ।

मन्त्रालयका अनुसार २०८३ मंसिर १ गतेदेखि उपत्यकाका विभिन्न स्थानमा ऐन कार्यान्वयन प्रक्रिया अघि बढाइएको छ । पहिलो चरणमा काठमाडौं उपत्यकाबाट कुखुरा, राँगा र खसीको मासु परीक्षण गरी उपभोगका लागि योग्य मासुमा आधिकारिक छाप लगाउन थालिएको छ ।

कृषि, वन तथा पर्यावरणमन्त्री गीता चौधरीको पहलमा पशु बधशाला तथा मासु जाँच ऐन, २०५५ संशोधन गरी कार्यान्वयनमा ल्याइएको मन्त्रालयले जनाएको छ ।

मन्त्री चौधरीले मासुको स्वच्छता र गुणस्तर खाद्य पदार्थसँग मात्रै सम्बन्धित विषय नभई नागरिकको जीवन र स्वास्थ्यसँग प्रत्यक्ष जोडिएको विषय भएको बताइन् ।

नागरिकले उपभोग गर्ने मासु सुरक्षित, स्वच्छ र गुणस्तरीय हुनुपर्नेमा जोड दिँदै उनले ऐन कार्यान्वयनलाई सुरुवाती अभियानमा मात्र सीमित नराखी निरन्तरता दिने प्रतिबद्धता व्यक्त गरिन् ।

मन्त्रालयले ऐनको प्रभावकारी कार्यान्वयनका लागि सम्बन्धित स्थानीय तहलाई नियमित अनुगमन तथा निरीक्षणको जिम्मेवारीसमेत दिएको छ ।

यस व्यवस्थाले बजारमा बिक्री हुने मासुको गुणस्तर नियन्त्रण गर्न, अस्वस्थ मासुको बिक्री वितरण रोक्न र उपभोक्ताको स्वास्थ्य सुरक्षालाई थप प्रभावकारी बनाउन सहयोग पुग्ने अपेक्षा गरिएको छ ।

काठमाडौं उपत्यकाबाट सुरु गरिएको यो अभियानलाई निरन्तरता दिँदै मासुजन्य खाद्य पदार्थको स्वच्छता र गुणस्तर कायम गर्ने मन्त्रालयको लक्ष्य रहेको छ ।

प्रकाशित मिति: १ मंसिर २०८३, मंगलबार

ग्लोबल नागरिक संवाददाता

'हामी जे देख्छौं, त्यही लेख्छौं र देखाउछौं'
सत्य-तथ्य निष्पक्ष ताजा समाचार'

यो खबर पढेर तपाईलाई कस्तो महसुस भयो ?


स्रोतहरू खुलाइएका बाहेक ग्लोबल नागरिकमा प्रकाशित सम्पूर्ण सामग्रीहरू ग्लोबल जर्नालिस्ट ग्रुपका सम्पत्ति हुन् । यसमा प्रकाशित कुनै पनि सामग्रीहरू छापा, विद्युतीय, प्रसारण वा अन्य कुनै पनि माध्यमबाट पुनःप्रकाशन वा प्रसारण गर्नुअघि अनुमति लिनुहुन अनुरोध छ ।

©2026 GlobalNagarik All rights reserved. | Website by Appharu.com