काठमाडौं । नेपाल एलपी ग्यास उद्योग संघले बजारमा ग्यासको अभाव नहुने भन्दै उपभोक्तालाई आवश्यकताभन्दा बढी सिलिन्डर सञ्चय नगर्न आग्रह गरेको छ।
संघका अनुसार भारतबाट एलपी ग्यासको आयात सहज रूपमा भइरहेको छ भने उद्योगहरूले पनि नियमित रूपमा सिलिन्डर रिफिल गरी बजारमा पठाइरहेका छन्। पछिल्लो समय ग्यासको आयातसमेत बढेकाले तत्काल आपूर्ति समस्या हुने अवस्था नरहेको संघले जनाएको छ।
नेपाल आयल निगमका अनुसार पछिल्लो २२ दिनमा ३९ हजार ७७४ मेट्रिकटन एलपी ग्यास आयात भएको छ। चालु आर्थिक वर्षको साउनमा करिब ५५ हजार मेट्रिकटन ग्यास आयात हुने अनुमान गरिएको छ।
गत आर्थिक वर्षको सोही अवधिमा ४४ हजार ३१८ मेट्रिकटन ग्यास आयात भएको थियो। बजारमा मागअनुसार ग्यास उपलब्ध गराउन निरन्तर प्रयास भइरहेको जनाउँदै संघले घरायसी उपभोक्तालाई प्राथमिकतामा राखेर ग्यास बिक्री–वितरण गर्न व्यवसायीलाई समेत आग्रह गरेको छ।
प्रकाशित मिति: २४ श्रावण २०८३, आइतबार
प्रतिक्रिया