काठमाडौं । स्वास्थ्योपचारका लागि लामो समय विदेशमा रहेका नेपाली कांग्रेसका पूर्वसभापति शेरबहादुर देउवा स्वदेश फर्किएसँगै पार्टीभित्र एकताको विषयले पुनः प्राथमिकता पाएको छ।
बिहीबार त्रिभुवन अन्तर्राष्ट्रिय विमानस्थलमा देउवालाई स्वागत गर्न पुगेका कांग्रेस नेता पूर्णबहादुर खड्काले पार्टीलाई पूर्ण रूपमा एकताबद्ध बनाउन देउवाको भूमिका निर्णायक हुने बताएका छन्।
जेनजी आन्दोलनका क्रममा भएको आक्रमणमा परी गम्भीर घाइते भएपछि थप उपचारका लागि विदेश गएका देउवा स्वास्थ्यलाभ गरी बिहीबार स्वदेश फर्किएका हुन्। विमानस्थलमा देउवालाई स्वागत गर्दै खड्काले उनी पूर्ण स्वास्थ्यलाभ गरेर नेपाल फर्किएकोमा खुशी व्यक्त गरे।
खड्काले देउवालाई पार्टीको अभिभावकका रूपमा प्रस्तुत गर्दै कांग्रेसभित्रको सम्पूर्ण एकता कायम गर्न उनको नेतृत्वदायी भूमिका आवश्यक रहेको बताए।
‘हाम्रो अभिभावक तथा पार्टी सभापति शेरबहादुर देउवा भदौ २४ गतेको घटनामा ठूलो आक्रमणमा परी गम्भीर घाइते हुनुभएको सबैलाई थाहा छ,’ खड्काले भने, ‘आज उहाँ पूर्ण स्वास्थ्यलाभ गरेर आउनुभएको छ। यसबाट हामी सबै खुशी र उत्साहित भएका छौँ।’
देउवाको स्वदेश फिर्तीले पार्टीभित्रको एकता प्रक्रियालाई अघि बढाउन थप आधार तयार भएको खड्काको भनाइ छ। उनले कांग्रेसलाई पूर्ण रूपमा एकताबद्ध बनाउने प्रक्रियामा देउवाले निर्णायक भूमिका निर्वाह गर्ने विश्वास व्यक्त गरे।
देउवा स्वास्थ्यलाभ गरी स्वदेश फर्किएसँगै उनको आगामी राजनीतिक सक्रियता र कांग्रेसभित्रको एकता प्रक्रियामा उनले खेल्ने भूमिकालाई लिएर पार्टीभित्र चासोसमेत बढेको छ।
प्रकाशित मिति: २८ श्रावण २०८३, बिहिबार
प्रतिक्रिया